Shillong, Risaw, 01: Ki shipai BSF jong ka 110 Battalion kiba la ïoh ïa ka jingtip kaba bniah na ki tnat syntiat ha ka Lah Sngi u Blei ba ki don ki kali kiba kit shini bad kiba hiar sha ka shnong Shella bad kiba ïaid lyngba ka surok na ka shnong Ichhamati ban poi sha khappud, mar mar ki la pynap shrip bad ki la ïoh ban bat 4 tylli ki kali ha kaba lai tylli ki dei kiba kit ïa ka shini bad kawei ka dei kaba kit ïa u rynsun ba shongdor kumba 10 lak.
Ha ka jingtohkit, ki nongñiah kali kim shym la lah satia ban ai ïa ki kot ki sla kiba biang ha kaba ïadei bad ka jingkit ïa ka shini bad ïa u rynsun.
Ïa ki kali, kynthup ïa ki nongñiah bad ïa ki mar ba la kurup la aiti noh sha ka ophis Custom ha Bholaganj ban leh ïa kaba donkam katkum ki kyndon jong ka aiñ.
