Shillong, Risaw, 03: Uwei u rawon ïa uba la tip kyrteng kum u Bah Hostanding Nongsteng u la mynsaw hadien ba u la hap shapoh ka riat kaba jrong kumba 200 phut ha kawei ka jaka ba la tip kum ka Laitmawroh-Ramkhen.
Katkum ka tyllong khubor ba la ïohlum la ïathuh ba ha ka 30 tarik Nailur, 2022 ka Kong Kron Majaw kaba dei ka kurim jong u Bah Shanbor Buhphang na ka shnong Laitmawroh ka la pyntip ba u Bah Hostanding Nongsteng uba la 23 snem ka rta u khun jong ka Kong Spalebon Nongsteng uba sah ha ka shnong Massar, Pynursla ki la leit khwai doh ryngkat bad u khun jong ka, u samla Kyrsoilang Majaw lem bad pyrsa kurim jong ka u Bah Meban Khongsngi ha kawei ka jaka ba la tip kum ka Laitmawroh-Ramkhen.
Ka kynhun jong ka Search and Rescue Team na ka tnat Fire and Emergency Service, na Shillong tang shu ïoh jingtip halor kane, ki la leit sha Laitmawroh-Ramkhen ban ïarap sei ïa u Bah Hostanding Nongsteng uba la sahkut hapoh riat baroh shimiet bad uba don hapdeng ka jingmynsaw.
Ïa u Bah Bah Hostanding Nongsteng la ïoh pyllait im da ka jingïarap lem jong ki paidbah nongshong lem bad ki Pulit jong ka Pynursla Police Station.
