Shillong, Risaw, 04: Ki shnat treikam jong ka Khasi Students Union (KSU) ba kynthup ïa ka Sawsymper Circle, ka Balat Border Area Circle bad ka Lawbah Border Area Circle ha ka sngi Thohdieng ki la wan tur sha nongbah Shillong ban pynlong ïa ka jingshong kyllaiñ myngngor ha Madan Malki ban pynjur shuh shuh ïa ka jingdawa na ka Sorkar Jylla ban kyntiew sha ka kyrdan Civil Sub Division ïa ka Mawsynram Community and Rural Development Block.
Ha ki kynta ba ka seng ka la pynlong ïa kane ka jingïakhih, la sakhi ruh ba ki nongïalam jong ki seng saiñpyrthei ki la wan ai jingkyrshan ba kynthup ïa u MDC ka Mawsynram Constituency u Bah Alvin Sawkmie, u MLA barim jong ka Mawsynram Constituency u Bah Himalaya M. Shangpliang uba long ruh u Nongaibuit ka Sorkar Jylla, u nongïalam ka Voice of the People Party (VPP) na Mawsynram u Dr. Rusievan Shangpliang, u Syiem ka Hima Bhowal u Pa’iem Kynsai Manik Syiem bad kiwei kiwei.
Ki nongïalam jong ka Khasi Students Union (KSU) South West Khasi Hills District ba la lamkhmat da u President u Bah Forwardman Nongrem ki la wan ai jingkyrshan ïa ka jingdawa jong ki lai tylli ki shnat treikam jong ka KSU.
U Bah Forwardman Nongrem ha ka jingïakren bad ki lad pathai khubor u la ong, “ngi la pynlong ïa ka jingïashong kyllaiñ myngngor ban pyrshah ïa ka jingleh mynthi jong ka Sorkar halor ka jingdawa ba la slem bha jong ki paidbah ka thaiñ Mawsyram ban kyntiew kyrdan noh na ka Community and Rural Development Block sha ka Civil sub-division bapura.”
U la ong na ka por sha ka por, ka Union ka la ïakynduh ruh ïa ka Sorkar Jylla hynrei kam shym la don kano kano ka jingpyni dak ban pynurlong ïa kane ka jingdawa mynta la palat 24 snem kata naduh u snem 2000.
“Ka Sorkar Jylla ka la shu kular kai ïa ki paidbah jong ka Mawsynram ban pyntreikam ïa ki jingdawa khlem da pynurlong pat ïa ki. Dei na kane ka daw, kaba la pynlong ïa ngi ban mih sha surok ban pynlong ïa ka jingïakhih ha nongbah Shillong na ka bynta ban pynbor ïa ka Sorkar ban pynurlong ïa ka jingdawa ban pynkha ïa ka Civil sub-division na ka bynta ka Mawsynram,”u la ong.
Shuh shuh u Bah Nongrem u la ong ba ïa ka Mawsynram C&RD Block la dei ban kyntiew kyrdan noh kum ka Civil sub-division da kaba pynshong nongrim katkum ka jingbun briew. Ïa ka Mawsynram C&RD Block la pynkha naduh 62 snem mynshwa.
“Ha u snem 2022, ka Sorkar ka la kyntiew kyrdan katto katne ki C&RD Blocks – ha Dalu, Rongjeng bad Jengjal. Lada phi peit ïa ka jingbun briew jong ki, ka lah ban tam ne duna kumba long ka Mawsynram, kaba don ïa ka jingbun briew kaba 50,000 hajar ngut katkum ka khanasamari jong u snem 2011. Hadien 12-13 snem, ngi khmihlynti ba ka jingbun briew kan kot palat 60000-70000 hajar ngut,” u la ong.
“Nalor kata, ka jingjngai sha Dalu na Tura ka long tang 30-32 kilomitar hynrei ka jingjngai na Mawsynram sha Shillong ka long 69 kilomitar bad na ki shnong khappud sha nongbah Shillong ka jingjngai ka long 100 kilomitar,” la bynrap u Bah Nongrem.
Une u nongïalam ka KSU u la pynkynmaw ïa ka jingkular jong u Myntri Rangbah ka Jylla u Conrad K Sangma ban wanrah ïa ka synshar ka khadar kaba kham jan sha ki paidbah da kaba ong, “hynrei ka long kaba sngewsih ba kam don ka jingshimkhia na ka liang jong ka Sorkar Jylla ban pyntreikam ïa ka thong kaba la buh hakhmat bad ban kyntiew kyrdan ïa ka Mawsynram block sha ka Civil sub-division bapura.”
“Namarkata, ngi la rai ban shim sa da kiwei pat ki sienjam ban pynbor ïa ka Sorkar ba kan pynurlong ïa kane ka jingdawa ba la slem jong ki paidbah nongshong shnong ka Mawsynram,” la ong shuh shuh.
