Shillong, Risaw, 12: Ka jingïakhih ba khlem pud sngi jong ki nonghikai skul SSA kiba don hapoh ka shatri jong ka All Meghalaya SSA Teachers Association (AMSSATA) ka dang bteng haduh mynta ha madan Mali ban dawa ïa ka Sorkar Jylla ban kyntiew shispah na ka shi spah ïa ka tulop ba khlem pynkiew shuh mynta la phra snem kynthih.
Kum ban shu pynkynmaw hangneba ka AMSASTA ka la aiti da ka jingthoh bad buh sngi khatduh ïa ka Sorkar ban pynkiew ïa ka tulop jong ki nonghikai skul SSA shuwa ka 30 tarik, Nailur, 2024, hynrei na ka liang jong ka Sorkar kam shym la ai ka jubab kaba shai.
Namar ka jingbym shai ka jubab na ka Sorkar ki nonghikai SSA ki la sdang ïa ka jingïakhih ba khlem pud sngi ha madan Malki kaba la kynjoh mynta sha ka sngi kaba khatar.
Kane ka kynhun ki nonghikai ka la phah ruh da ka jingthoh sha u Lat ka jylla u CH Vijayashankar ba un tuklar lem halor kane bad dang shen ki la leit rah ruh ïa ka jingthoh sha ka Sorkar ba la aiti ha u Myntri ka Sorkar Sorkar Jylla u Bah Paul Lyngdoh ha kaba ula kular ban sa phah ïa ka jingthoh sha u Myntri ka tnat Pule Puthi u Rakkam A. Sangma.
Dang shen mynta ka taiew ka kynhun ki nonghikai skul SSA kiba don hapoh ka shatri jong ka Meghalaya SSA School Association (MSSASA) ba la lam khmat da u President u Bah Aristotle C. Rymbai ki la ïakynduh ïa ki nongïalam jong ka AMSSATA ba la lamkhmat da u General Secretary u Bah Wanpyndaphi Lapang ban ïakren ïasngewthuh jingmut halor ka jingdawa jong kine ki ar tylli ki kynhun jong ki nonghikai skul SSA hapoh ka Jylla.
