Shillong, Risaw 15: U Myntri ka tnat Pule Puthi ka Sorkar Jylla u Rakkam A. Sangma ha ka sngi Baar ula ithuh ba ka Sorkar Jylla ka la mad jingeh bha ha kaba ïadei bad ka pisa pilaiñ na ka bynta ban siew tulop ïa ki nonghikai skul SSA hapoh ka Jylla.
“Kam long kaba suk ïa ka Sorkar ban shim rai ïa ka jingeh, kaba la mih naduh ka sngi banyngkong, naduh ba la pyntreikam ïa ka SSA program ha Meghalaya,” la ong u Rakkam.
U la ïathuh ba ka Sorkar India ka la rai ban khate noh 5 percent ka jingsiew tulop kaba manla u snem bad ka Sorkar Jylla ka la hap ban kit ïa kane ka lyngkor kaba khia da kaba siew na ka pla tyngka jong ka jylla.
Dei na kane ka daw ba ka Sorkar Jylla ïa mynta ka la hap ban bei 30 percent ïa ka jingsiew tulop lada ïa nujor bad ki snem kiba mynshwa ha kaba ka bhah hapdeng ka Sorkar India bad ka Sorkar Jylla ka long 90:10.
“Mynshwa ka SSA ka dei ka prokram jong ka Sorkar India. Ha ka por ba la wanrah ïa kane ka prokram, ka dei ka prokram jong ka Ministry of education ka Sorkar India, ka Sorkar Jylla ka shu ïarap ïa ka jingsiew tulop kaba tang 10%. Hynrei naduh u snem 2018 ka Sorkar India ka la pynkylla ïa ki kyndon (capping norms),” la batai u Rakkam.
“Naduh mynta, ka Sorkar India ka la khate 5% manla u snem bad ka Sorkar Jylla ka la hap ban kyntiew ïa ka bhah ban buria ïa ka 5% ba la khate da ka Sorkar na ka bynta ban siew tulop ïa ki nonghikai skul SSA. Shwa jong u snem 2018, ka bhah ka long 90:10 hynrei mynta, naduh une u snem, ka Sorkar Jylla ka la hap ban buria haduh 30% ka jingsiew tulop bad 70% la siew da ka Sorkar India,” la ong u Rakkam bad bynrap, “naduh u snem 2025 ka Sorkar Jylla kan hap ban bei sa 35% ka bhah siew tulop bad 65% yn sa bei da ka Sorkar India. Lehse ha ki lai snem ki ban sa wan, ka Sorkar Jylla kan hap ban bei 50% ka jingsiew tulop.”
“Nga ïohi ba ka Sorkar ka la kyntiew ïa ka tulop 5% manla u snem. Haoid, ka pisa kan sah kumjuh hynrei ka Ministry ka la khate noh 5% ïa ka bhah siew tulop manla u snem bad ka Sorkar Jylla ka hap ban buria na lade,” u la ong.
Shuh shuh, u Myntri ka tnat Pule Puthi u la ong, ka tnat ka la mad bun tylli ki jingeh. Mynta sa 10,000 ngut ki nonghikai skul adhoc ruh ki la dawa ban kyntiew ïa ka tulop.
“Ngi la shong jingïalang bad u Myntri Rangbah ruh la bunsien halor kane ka mat. Ka jingïoh lum khajna duna jong ka Sorkar ka dei kawei ka daw, ngin ym lah ban shim rai ha kajuh ka por, hynrei, ngin sa wad ïa ki lad ki lynti kumno ban ïarap ïa ki nonghikai,” la ong shuh shuh u Rakkam.
