Shillong, Risaw, 16: Ki riewniam jong ka Jingïasyllok Christians Brothers kiba ju peit bad pynïaid ïa ka pule ka puthi ha St. Edmund’s Higher Secondary School bad ha St. Edmunds College ha kane ka Jylla Meghalaya ki la ïam pangnud bad dap da ka jingsngewsih kaba khraw halor ka jingkhladnoh jong u Brother Eric Steve D’Souza ha kaba ïa ka met jong une u riewniam la tep donburom ha ka sngi Balang ha nongbah Shillong ha u lum jingtep jong ka Balang Catholic ha Laitumkhrah.
Shwa ban rah leit ontep sha u lum jingtep, u Myntri Rangbah ka Jylla bad ki khynnah skul barim kiba la shah hikai ha u Brother Eric D’Souza mynba ki dang long tang ki khynnah pule jong ka St. Edmund’s School, Shillong ki la leit ban ai khublei khatduh ïa une u nonghikai bad ban pynpaw ruh ïa ka jingsngewsih kaba khraw halor ka jingduhnoh ïa u Brother D’Souza uba la noh synniang shikatdei eh ha ka pule ka puthi ha kane jylla Meghalaya da kaba wanrah ruh shibun ki buit hikai kiba thymmai ha ka kam hikai skul bad nalor ba u la long ruh u nongseng ïa ka Providence School ha Meghalaya, kaba dei ka shlem pule kaba plie lad ïa ki khynnah kiba wan na ki longïing kiba kham duna ka ïoh ka kot.
Kumba ju long ka rukom, la pynlong shwa ïa ka Mass Bakhuid ba la pynbynta da u Archbishop jong ka Jyllaniambah Shillong u Most Rev. Victor Lyngdoh ha ryngkat ka jingsynran lang jong u Vicar General u Rev. Fr. Richard M. Majaw bad kiwei kiwei ki Lyngdoh Sohblei, kynthup ruh ki bahaing hasem ki khynnah skul, ki nonghikai skul bad kolej jong ka St. Edmund’s Higher Secondary School bad ki bor pynïaid jong ka skul bad Kolej.
Ha baroh shi lynter ka jingim kum u riewniam, u Br. D’Souza u la hikai ha ki skul ba la pynïaid da ka jingïasyllok Christian Brothers ha West Bengal, New Delhi, Mangalore, Assam, bad Meghalaya ha kaba bun na ki khynnah skul ki la kiew bad ki la tynshaiñ bha ha ka pule puthi.
Kum ban shu kynmaw, u Br. D’Souza u la khladnoh ha ka step sngi u Blei ha Regina Mundi, Goa hadien ba ka jingpang ka la ban la kham slem.
