Shillong, Risaw 16: Ka Khasi Students’ Union lyngba ka Employment Monitoring Cell ha ka sngi Balang ka la ïoh ban pynsngew hakhmat u Minister ka tnat Arts & Culture ka sorkar jylla u Bah Paul Lyngdoh ïa ka jingbakla na ka liang ka Personnel & A.R Department ban pyntreikam ïa ka roster, ha kaba ka post jong “Guitar Instructor” ha ka State Institute of Arts & Culture kan leit lut 100% sha ka Garo category.
Ha 14 tarik u Risaw, 2024 ka KSU ka la ïakynduh ïa u Cyril V.D. Diengdoh, IAS u ba bat kum u Secretary jong ka Personnel & A.R Department halor kane ka mat hynrei kam shym lah hun satia ïa ka jubab ba la ïoh na une u ophisar u bym shym don ïa kano kano ka jingkitkhlieh ba kan duh noh ka bhah jong ki Khasi Jaiñtia ïa kane ka post. Hynrei u la kren kyllaiñ bad pyni ïa ki jingeh ban pynkylla ïa kane ka kam ba la dep ban pynbna.
Ka Seng ka ngeit skhem ba kine kiei kiei baroh ki jia namar ba ka Sorkar lyngba kane ka tnad jong ka Personnel & A.R Department kam shym la pyntreikam ïa ka roster katkum ki jingpynshai ba lah ai sha ka Seng bad sha ki paidbah ba ka roster kan ïaid shakhmat khlem kylla dien (prospective) hynrei ka long pynban da khongpong (retrospective). Ka jingleh jong kane ka tnad kan pynduh noh ïa ka bhah ba dei ban ïoh ki Khasi haduh u snem 2040-2045.
Ha kaba ïadei bad kane na ka liang u Bah Paul Lyngdoh, Myntri ba dei peit ïa kane ka tnat Arts and Culture u la kular ban shimkhia halor kane ka bynta.
