Shillong, Risaw, 17: Ka jingshna ïa ka Shillong ropeway project kaba la ap khmihlynti la slem bha kan sa sdang naduh u bnai Naiwieng mynta u snem.
Ïa kane, la pyntip da u Myntri ka tnat Jngohkai Pyrthei u Bah Paul Lyngdoh. “…ka Shillong Ropeway project ka la ïaid shakhmat bad ka jingtrei kan sa sdang naduh ka taiew baar jong u Naiwieng mynta u snem,” la ong u Bah Paul.
U la ong, ba kam don satia kano kano ka jingkiew dor ha kaba kaba ïadei bad ka jingmang pisa kaba neh beit T. 175 klur.
Haba kylli, u Myntri ula ong, “ïa mynta, ngi la plie ar tylli ki Bidding-kawei na ka bynta ka Technical Bid bad kawei pat ka Financial Bid. La pyntip ïa nga ba ki don lai tylli ki kompeni, kiba la tyrwa ban pyntrei ïa kane ka projek bad kiba la kot katkum ka CEN Standards, kaba dei ka International Standard ban shna ïa ki ropeway project ha ka dewbah Europe, kaba mut namarba ka jinglong jingman jong ki lum ki them ha ka jylla jong ngi, ngi la hap ban khot da ki kompeni kiba tbit.”
