Shillong, Risaw, 18: Ka Kynhun Myntri ha ka sngi Thohdieng ka la mynjur ïa ka skhim, na ka bynta ban ai jingïarap pisa T. 2 lak sha ki District Task Forces (DTF) na ka bynta ka jingthmu ban pyntreikam ïa ka Meghalaya Residents Safety and Security Act (MRSSA), 2016 ha ka Jylla.
Ha ka jingïakren bad ki lad pathai khubor hadien ba la wai ka jingïalang, ka Myntri kaba khmih ïa ka tnat Aiñ ka Dr. M. Ampareen Lyngdoh ka la ong ba ka Sorkar ka donkam ban wanrah ïa kane ka skhim na ka bynta ka jingpyntreikam ïa ka MRSSA.
“Kane ka skhim ka kynthup ïa ki kyndon hapoh ka jingai pisa ïa ki Deputy Commissioner ba kin ïoh ïa ka mang pisa khnang ba ka jingtrei bad ka jingbuddien ïa ka MRSSA kan sdang kloi. Ïa kata ladep leh bad la rai ba ngin ai pisa kaba duna eh T. 2 lak na ka bynta kawei ka distrik. Ha ka distrik, kan don ka jingdonkam ïa ka mang tyngka kaba kham heh namar ka jingbun ki bor synshar kum ki Dorbar Shnong, kiba don ha kano kano ka rukom ban ïarap ha kaba peitngor ïa kiba wan nabar,” ka la bynrap.
U Secretary in-charge Law and Parliamentary Affairs u Bah Cyril Diengdoh u la ong ba ki DTF ki dei kiba la pynkupbor ban pynshisha ïa ki nongshongwai katkum ki kyndon jong ka MRSSA.
“Hapoh kane ka kyndon, yn hap ban bei pisa ban thied ïa ki laptop, computer, bad ban don ruh wat ïa ka internet. Ki DTF ki don ruh ïa ki non official members, ki ban sa ïoh jingsiew, ka TA/DA bad kiwei kiwei de ki jingdonkam. Bun na ki Rangbah Shnong ha ka jingshisha ki la pan ïa ki Laptop bad ki Computer khnang ba kin dup lah ban pynrung ïa ki kyrteng jong ki trai ing bad ki nongshong wai ha ki shnong ki jong ki,” u la ong.
Katkum ka jingong jong u, bun na ki shnong hapoh ka nongbah Shillong ki ladep sdang ïa ka bynta banyngkong ban pyntreikam ïa ka MRSSA da kaba pynrung ïa ki jingtip kiba bniah halor ki trai iing bad ïa ki nongshong wai ha ki shnong ki jong ki.
“Hynrei, ki mad ruh ïa ki jingeh namarba ka dei ka Online Database. La hap ban leh Online namarba la hap ban khmih ruh da ki Pulit bad da ki District Task Force. Dei na kata ka daw la shna ïa ka Online Database ha ka Portal. Khnang ba kan treikam janai bad ban pynthikna ba kane ka aiñ kan treikam katkum ka thong ba la pynkupbor ha ka aiñ, ka Sorkar ka la wanrah ïa ka skhim kaba mar T. 2 lak ban ai sha ki District Task Force bad kito ki district kiba kham donkam kham bun kin ïoh kham bun, ha kaba kin thied ïa ki laptop, computer, ka bai shong jingïalang ki non-official member bad kiwei kiwei na ka bynta ka jingpyntreikam ïa ka MRSSA,” la ong u Bah Diengdoh.
