Shillong, Risaw, 21: Ka Hynñiewtrep Integrated Territorial Organisation (HITO) ha ka Lah Sngi u Blei ka la mudui da ka ejahar sha ka Director General of Police (DGP) ka Kong I. Nongrang pyrshah ïa u Deputy Commisioner u Abhilash Baranwalbad ïa u Superintendent of Police u Giri Prasad, ïa u Waheh Shnong ka Wahïajer, ïa ka Meghatop Cement Pvt Limited, ïa ka Meghalaya Pollution Control Board (MSPCB) halor ka jingjia ha ka Public Hearing kaba la long ha ka shnong Wahïajer, East Jaiñtia Hills District.
Ka HITO ka la mudui ruh sha u Chief Secretary ka Jylla u Bah Donald P. Wahlang da kaba dawa ban pynkynriah kam noh mardor ne ban sospon ïa ki ophisar sorkar kiba don ha ka Public Hearing ha ka shnong Wahïajer ha ka 18 tarik mynta u bnai.
Ka seng ka la ujor ruh sha ka Meghalaya Human Right Commission (MHRC) namarba ka don ka jingkhanglad ïa ki paidbah ban leit sha ka Public Hearing ban pynsngew ïa ki jingpyrshah ban tei ïa ka karkhana pynmih dewbilat (Integrated Cement Plant of capacity 3.3 MTPA Clinker, 2.8 MTPA Cement bad 16MW Waste Heat Recovery System) jong ka M/s Meghatop Cement Pvt Limited ha shnong Wahïajer Narpuh, East Jaiñtia Hills District.
Ka jingujor ejahar jong ka HITO sha ka DGP ka long namar ka jingpynap da ki briew kiba rah ïa ki dieng tylli bad kynnoh ba la thmu ban tied pynmynsaw ïa ki dkhot sengbhalang kiba leit ban pyrshah ïa ka Public Hearing.
“Ka jingujor ejahar ïa u DC bad ïa u SP ka long namarba kim shym la lah ban peit kum ki bor synshar district,” u la ong.
“Ka jingujor sha ka Meghalaya Human Rights ka dei namarba ka jingkhanglad ïa ka sur jong ki nongshong shnong ban pynpaw ha kato (ka sngi). Ngi lap ruh ba u Waheh Shnong (ka Wahïajer) u la pynkheiñ ïa ka Sanad katkum ka Section 32 jong ka JHADC kaba la kren shai bym dei ban ñiew shiliang bad bym dei ban leh shi liang ïa ki nongshong shnong. Bun na ki briew kiba don ha kato ka Public Hearing ki dei kiba nabar bad kim dei ki nongshong shnong namarba ngi la sahmiet lypa ki nongshong shnong ki la batai ïa ngi bad ki la pyni ruh ha ngi ïa ki jingeh jong ki,” la ong u President ka HITO u Bah Donbok Dkhar ha ka jingïakren bad ki lad pathai khubor.
“Halor ka jingjujor pyrshah ïa u DC bad ïa u SP jong ka East Jaiñtia Hills ki lah ban tap eitmiaw ba ki Volunteer (ba la buh ha kato ka sngi) ki dei ki VDP hynrei ngin da la bishar bha katkum ka Meghalaya Police Act, 2011 kat Section 61 bad 62 bad 63 ka kren shai ba ki Volunteer jong ka VDP kim dei ban don palat ïa ka 15 ngut hynrei ngim ju kham ïohi thala ïa u lathi ruh ban rah hynrei kito ki briew hangto ki dei ki Gunda ba la shu siew dor sngi,” la ong shuh shuh u Bah Dkhar.
“Ka DGP ka dei ban leh da kaba tyngeh ïa kito ki briew kiba rah da ki dieng tylli kiba la shah siew dor sngi. Ngi kwah ban phah ïa u kyrwoh sha ki ruh ba ka jingïoh jong phi T.500, T.1000 lada ki bor jong ka aiñ kin treikam phin hap ban lut laiphew shah bad hap ban pynlut ha ka bai siew jamin da ki phew hajar,” ong shuh shuh u Bah Dkhar.
U la ong ruh ba ka jingshah khynñiat jong ki longkmie ha ka sngi shwa ban sdang ka Public Hearing ka long ka bym don shuh ka jingburom ïa ki longkmie.
