Shillong, Risaw, 23: Ka Kur Syiem na ka kpoh Mylliem ha ka sngi Balang ka la mih shakhmat ban pynksan bad ban ai jingkyrshan ïa ki Myntri kiba la ujor pyrshah ïa u Syiem ka Hima Mylliem u Ainam Manik Syiem sha ka Khasi Hills Autonomous District Council (KHADC).
Dang shen an ngut ki Myntri jong ka Hima Mylliem bad kynthup ruh ïa u Basan jong ka Raid Nongkseh ki la ujor ha u Deputy Chief Executive Member (Dy. CEM) jong ka KHADC u Bah Pynshngaiñ N. Syiem uba peit ïa ka tnat Elaka Administration da kaba kynnoh ba u Syiem jong ka Hima Myllliem u Pa’iem Ainam Manik Syiem u la die lilam ïa ka lyngkhot khyndew jong ka Hima Mylliem kaba don ha law syiem ha Umshing Umjapung khlem ka jingtip bad ka jingmynjur da ka Dorbar Pyllun jong ki Bakhraw Batri ka Hima Mylliem kaba long pyrshah ïa ki riti ki dustur bad ïa ki aiñ jong ka Hima Mylliem.
Ki Myntri kiba la ujor ki kynthup ïa u Myntri Syndor, u Myntri L.Rumnong Sohsla, u Myntri Nongkhlaw, u Myntri Kharbteng, u Myntri Shanpru bad u Basan ka Raid Nongkseh.
Ki la kynnoh ruh ba ka jingleh jong u Syiem ban aiwai ïa ka khyndew haduh 20 snem khlem ka jingtip bad ka jingmynjur da ka Dorbar Pyllun ki para Bakhraw jong ka Hima Mylliem ka long ka jingleh donbor ïa ka kam synshar khadar bad ka long ruh ka jingpynkheiñ ïa ka kyndon 7 (c) bad (e) bad 4 (A) jong ka Mylliem Syiemship Act 2007 bad ïa ka Administration of Mylliem Syiemship Rules, 2015.
Nalor kata, ki la dawa ïa ka KHADC ban weng noh mardor ïa u Syiem na ka khet synshar da kaba kynnoh shuh shuh ba u la don bynta ruh kumba ladep ujor naduh ka 26 tarik, Risaw, 2023 ban pynjah klep ïa ka pisa jong ka Hima Mylliem kaba kot T. 5, 58, 30, 451 klur da kaba ai dulir pynskhem khyndew ïa ka khyndew jong ka Hima Mylliem kaba don ha iew Mylliem Rim.
Halor kine ki jingkynnoh, u Syiem ka Hima Mylliem u Ainam M. Syiem u la ai por 10 sngi ba kine ki Myntri bad u Basan kin pynshai hynrei lym kumta u la byrngem ban mudui sha ki bor jong ka aiñ.
Ha ka jingïakren bad ki lad pathai khubor, u Bah Alban Syiem ula ong, “ngi ka kur Syiem na ka kpoh Mylliem ngi don ka jingsngewkhia ïa ka synshar ka khadar hapoh ka Hima Mylliem kumba ngi ïohi ïa ki social media bad ha ki kotkhubor ïa ki kynrum kynram ha ka synshar ka khadar. Ngi la pynshai ruh ha ka kotkhubor ha ka 22 tarik Risaw, 2024 halor ka jingleh donbor jong u Ainam Manik Syiem bad ki katto katne ngut ki Myntri khlem da kheiñ shuh ïa ka rul ka aiñ jong ka Hima Mylliem bad ka Dorbar Pyllun jong ka Hima.”
“Ngi ai ka jingkyrshan kaba pura ïa ki Myntri kiba la mih shakhmat ban kren ïa ka jingshisha halor ka jingleh jong une u Syiem ba mynta,” ki la bynrap.
“Ka Kur syiem na ka kpoh Mylliem ngi dap da ka jingsngewkhia ïa ka jinglong syiem bapura jong u Ainam Manik namarba ka jinglong syiem hapoh ka Hima Mylliem ka mih tang na ka kpoh jong ka Kur Syiem na Myllliem, Laitkor bad Mawlai. Hynrei halor kane ka jingjied ïa u syiem bapura, ka kur Syiem na ka kpoh Mylliem kam don satia ïa kano kano ka jingtip halor ka elekshon jied syiem bad kam shym la don kano kano ka notis ne ka jingai jingtip na ka ophis jong ka KHADC lane na ka ophis jong u Syiem Hima Mylliem,” la ong u Bah Alban Syiem.
“Ka Kur Syiem na Mylliem ka kyntu ïa ka KHADC ban shimkhia halor kane ka kam,” u la ong bad bynrap, “ha kaba ïadei bad ka jingleh donbor lada ngi phai ha kiba bun bah hynrei ïa ka jingaiwai ïa ka jaka kaba heh 5 hajar sqft ha lawsyiem Umshing Umjapung ka dei kaba khlem shim rai da ka Dorbar Pyllun.”
