Shillong, Risaw, 24: Nangne shakhmat kino kino ki shynrang Khasi kiba ïoh tnga da ki kynthei ki bym dei na ka jaidbynriew Khasi tangba kiba dei pat na kiwei ki jaidbynriew riewlum, ha ka tangjait, ki la lah ban ai beit da kano kano ka jait kaba ki sngewbit khlem da donkam shuh ban thoh nakhmat ïa ka kyntien, “KHAR” kumba ju long baroh shikatta ha ka tangjait.
Kane ka long hadien ba ka Khasi Hills Autonomous District Council ka la wanrah ïa ka jingpynbeit thymmai ha ka Khasi Hills Autonomous (Khasi Social Custom of Lineage) Amement Bill, 2023 kaba la ïoh dang shen ïa ka jingmynjur na u Lat ka Jylla Meghalaya ban pynlong ain ïa kane ka ain-rew.
Ha ka jingïakren bad ki lad pathai khubor ha ka sngi Palei, u Chief Executive Member jong ka Khasi Hills Autonomous District Council (KHADC) u Bah Pynïaid Sing Syiem u la ïathuh ba lyngba kane ka aiñ la pynrung ruh ïa ka Clan Administration ban ithuh ïa ki kur ki jait kiba don kumba 3 hajar tylli hapoh ka ri Khasi.
U la ïathuh ruh ba ka la don ka jingwad bniah ïa ka jingdon jong ki kur ha rilum Khasi ha kaba shen yn sa pynmih ha ka dur jong ka Kot.
U la ïathuh ruh ba katkum ka kyndon hapoh jong kane ka ain, nangne shakhmat baroh ki seng kur ne ki kur bapher bapher kiba don hapoh ka ri Khasi kin hap ban register hapoh ka ophis jong ka Khasi Hills Autonomous District Council bad ha kajuh ka por, ïa ki nongkitkam jong ki seng kur dei ban phah sha ka District Council ban buh rekod.
