Shillong, Risaw, 26: Ki bahaiing hasem haduh mynta ki dang sah hapdeng ka umdum halor ka jingïap jong i Kong Niancy Riahtam bad iwei i heprit iba dang 5 snem ka rta ïa iba la tip kum i heprit Erica Thabah.
Ïa ka met jong kine ki arngut ki lanot kiba la per ha sla um jong ka Wah Umshing kaba hap ha ka bynta jong ka shnong Mawiong Umjapung la lap da ki khynnah rit ha ka 19 tarik, Nailur, 2024 ha ka por 12:30 baje noh sngi.
I hynmen jong i Kong Niancy Riahtam ha ka jingïakren bad ki nongthoh khubor ha ka sngi Saitjaiñ i la ïathuh ba ka Post-mortem Report ba la ïoh na ka NEIGRIHMS Hospital, Shillong kam pat pynpaw shai satia halor ka jingïap jong i Kong Niancy Riahtam bad i heprit Erica Thabah.
“Ngi dang ap sa ïa ka Forensic Report ban tip ïa ka jingjia kaba bniah halor ka jingïap jong kine ki arngut,” la ong i hymmen jong i Kong Niancy Riahtam.
Kum ban shu pynkynmaw hangne, i kong Niancy Riahtam iba sah ha ka Dong Tariang A, Mawiong Umjapung i la jahrngai naduh ka 18 tarik Nailur, 2024 ha ka por ba i la leit sha ka shnong Mawiongrim ryngkat bad i heprit Erica Thabah hynrei kine ki arngut ki la jah rngai ha ka lynti ban leit phai sha la iing bad ïa ka met jong ki la lap da ki khynnah rit kiba dang thmu leit jngi ha wah Umshing ha ka 19 tarik Nailur, 2024.
