Shillong, Risaw, 28: U Myntri Rangbah ka Jylla u Conrad Kongkal Sangma ha ka jingïakynduh ïa ki nongïalam jong ka Meghalaya SSA School Association (MSSASA) ha Tura, West Garo Hills District ha ka Lah Sngi u Blei u la kular ba ka Sorkar Jylla kan da thawlad ban pynurlong ïa ki jingdawa ba ki nonghikai skul SSA ban pynskhem ïa ka kam hikai skul jong ki.
Ka MSSASA ka la ai por ar bnai ïa ka Sorkar Jylla ban wanrah da ka polisi ban pynskhem ïa ka kam jong ki 13000 hajar ngut ki nonghikai skul SSA ha ka jylla Meghalaya.
“Ha ka jingïalang, ngi la ïathir ïatai sani bha ha kaba ïadei bad ki katto katne ki jingai jingmut ba la pynkhreh da ka tnat Pult Puthi ha kaba ïadei bad ka jingwanrah da ka polisi na ka bynta ban pynskhem ïa ka kam jong ki nonghikai skul SSA ha ka jylla Meghalaya,” ong u Bah Aristole C. Rymbai ha u kyrwoh ba la phah sha ki lad pathai khubor.
“U Myntri Rangbah u la pyntip ïa ngi ba ka Sorkar ka la angnud bad ka skhem ha kaba ïadei bad kane ka mat bad shen ka Sorkar kan sa khot ïa ngi ban ïathir sani kham bniah halor kane ka mat shwa ba ka Sorkar kan shim ïa ka rai kaba khatduh,” u la bynrap.
Haba pynpaw ba ka jingïalang ka long kaba seisoh bad kaba tei, u Bah Rymbai u la ong, “…..ngi kyrmen ba ha ki khyndiat sngi ban sa wan, ka Sorkar kan sa wanrah da ka polisi na ka bynta ban pynskhem ïa ka kam jong ki nonghikai skul SSA ha ka jylla Meghalaya kumba la leh ha kiwei kiwei ki jylla jong ka ri.
U la ai khublei ruh ïa ki Myntri Sorkar kiba la ai jingkyrshan ïa kane ka mat jingdawa ha ka jingïalang Kynhun Myntri kaba la long dang shen ha Resubelpara, North Garo Hills District.
“Ngi pynpaw ka jingsngewnguh bad ka jingai khublei ïa ka Sorkar hapoh ka jingïalam jong u Conrad Sangma kaba la mynjur ba ka rta rungkam jong ki nonghikai skul SSA yn pynjlan na ka 37 snem sha ka 45 snem khnang ba kin ïoh ïa ka lad ban aplai ïa ki kam sorkar ha ka kam hikai skul naduh lower primary haduh ka kyrdan higher secondary,” la bynrap u Bah Rymbai.
