Shillong, Risaw, 28: Ka Khasi Students Union (KSU) South West Khasi Hills District bad ka KSU Seng Kmie ha ka Lah Sngi u Blei 2024 ka la rakhe ïa ka sngi pyrshah tih Uranium ne ka Anti Uranium Day ha ka lyngkhuh sngi ïap ba 4 snem jong i Meiieid Spility Lyngdoh Langrin da kaba teh ïa ki poster bad ïa ki banner ha iew Mawkyrwat bad ha nongbah Shillong kum ka dak ban pynpaw ïa ka jingpyrshah ïa ka jingthmu jong ka Sorkar ban ïoh tih ïa u Uranium bad ban ñiew burom ruh ïa ka jingïaleh ba khlem pyndem tad haduh ka sngi ka jingïap jong i Meiieid Spility Lyngdoh Langrin.
Kum ban shu pynkynmaw hangne ba i meiieid Spility Lyngdoh Langrin i la dei i nonglam khmat ba nyngkong eh ha ka jingïakhun ban pyrshah ïa ka jingtih ïa u marpohkhyndew Uranium naduh ki snem 1980 ter ter tad haduh ba in da khladnoh na kane ka sla pyrthei.
Ha ka por ba ka Uranium Corporation of India Limited ka la tyrwa da ki phew klur ban aiwai ïa ka khyndew ha ka shnong Domïasiat, i Meiieid Spelity i la kren ïa kine ki kyntien da kaba ong, “ka pisa kam lah ban thied ïa ka jinglaitluid jong nga bad kumjuh ruh ha u snem 1990 hadien ba ka Sorkar ka la pynmih ïa ka Pre-Military Order ban shim duh ïa ka khyndew i meiieid Spelity i la phah da ka jingthoh sha u Myntri Rangbahduh ka ri India da kaba pynpaw ïa kine ki kyntien, “kan kham bha ban shah khrai khlieh ban ïa kaba duh noh shi inshi ka khyndew.”
