Shillong, Risaw, 30: Ka North Eastern Hill University Students Union (NEHU) bad ka Khasi Students Union (KSU) NEHU Unit ha ka sngi Balang ki la aipor khatduh tad haduh ka shiteng synñia ka 4 tarik Naiwieng, 2024 ïa u Vice Chancellor u Prof. PS Shukla ban wengkam mardor ïa u Resgistrar u Colonel (Retd) Omkar Singh lem bad u Deputy Registrar (Academics) u Amit Gupta bad kynthup ruh ïa kiwei kiwei ki nongtrei ba la shu thungkam sop sop.
Nalor ka jingdawa ban weng mardor na ka kam ïa kiba shu thung kam sop sop, ka NEHUSU bad ka KSU NEHU Unit ki la dawa ruh ïa u Vice Chancellor ban thung Pro Vice Chancellor mardor ha Main Sampus, Shillong bad ha Tura Campus.
Kiwei pat ki nongtrei ba ki samla pule ki la dawa ban weng na ka kam ki kynthup ïa u Officer on Special Duty (OSD) u Dr Debashish Chowdhary bad ïa u Incharge jong ka NEHU Guest House u Sajan K Job.
Ïa kine ki ar tylli ki kynhun la synran lang da ki samla pule kiba la kerkut ïa ka ophis treikam jong u Prof. PS Shukla ha Administrative Block da kaba rah ruh ïa ki plakad ban pynrem jur ïa u Prof Shukla bad ïa u Registrar.
Ki samla pule ki la dawa ïa u Prof Shukla ban ai da ka jingkular ban pynurlong ïa ka jingdawa jong ki hapoh ka por ba la buh lym kumta kin pynlong da ki jingïakhih ba tyngeh.
Katba ki samla pule ki dang pyrta shla hakhmat ka ophis treikam u Prof. PS Shukla u la wanpoi sha Administrative Block ban pynksan ïa ka jingthungkam ïa kine ki saw ngut ki Ophisar da kaba ong ba ka NEHU ka la thung da ka Inquiry Committee bad ka Sorkar Jylla ruh ka donbor ban thaw ïa ka komiti ban phah tohkit ïa ki jingkynnoh ba ka don ka kynrum kynram hapoh ka skulbah NEHU.
Ki samla pule bad ki nonghikai ki la kynnoh ba u Registrar bad u Deputy Registrar kim long satai kiba bit bad kim pat kot bor ban shimti ïa kam ba la bynshet ha ki.
“Ngim sngew ïahap ïa kane ka jingleh jong u Vice Chancellor namarba wat hapdeng ki kynrum kynram u dang nud ban shim shuti. Ha ka jingshisha u dei ban don hapoh NEHU ban ïakren pynbeit ïa ki kynrum kynram. Lada um don ka jingkitkhlieh ïa ka bha ka miat jong ki samla pule bad ïa ka NEHU kan bha ba un mih noh na kane ka skulbah,” la pynpaw ki samla pule.
