Shillong, Naiwieng, 05: Ki samla pule jong ka North Eastern Hills University (NEHU) Shillong ki la pynlong da ka jingïakhih ban shah jingit khlem pud sngi bad pynbna ruh ban khang khyrdep ïa ka skulbah NEHU naduh lashai ka sngi Balang.
U General Secretary jong ka NEHU Student Union (NEHUSU) u samla Toniho Kharsati u la pynbna ïa kane hadien ka jingïakynduh ba tang khyndiat por ïa u Vice Chancellor jong ka skulbah NEHU u Prof PS Shukla.
U samla Toniho Kharsati u la ong, “watla u Vice Chancellor u la mynjur ban ïakynduh ïa ngi ki samla pule hynrei um pat long uba kloi ban ïakren ïa ki jingdawa jong ki samla pule kiba la buh hakhmat jong u naduh u snem 2022.”
“U Vice Chancellor um nud ban shimkhia ïa ki mat jingdawa jong ngi kiba ngi la aiti lyngba ki dorkhas naduh u snem 2022. Kumta naduh lashai ka 6 tarik u Naiwieng ngin leit khang khyrdep noh ïa ka skulbah NEHU bad naduh mynta ka kynti ngin sdang ïa ka jingshah thngan ba khlem pud sngi tad haduh ba ki bor ba dei peit ïa ka NEHU kin shim ki sienjam ban pynurlong ïa ki jingdawa jong ngi,” la ïathuh u General Secretary ka NEHUSU.
U la kyntu ïa ka Sorkar Jylla ba kan tuklar halor ka jingdawa bad thung noh da u Vice Chancellor uba thymmai ha skulbah NEHU uba don ïa ka jingkitkhlieh na ka bynta ka lawei jong ki samla pule bad jong ka NEHU baroh kawei.
U President jong ka Khasi Student Union (KSU) NEHU Unit, u samla Shibaitlang Rymbai haba bynrap, u la ong ba ka seng kan ïai bteng ïa ka jingïakhih bad ka khot bad wer ïa ki para samla kiba pule ha NEHU ban ïasnohkti lang ha ka jingïakhih da kaba shah thngan khlem pud sngi tad haduh ba u Vice Chancellor un da pynurlong ïa ki mat jingdawa jong ki samla pule.
“Kine ki mat kim dei tang ki mat jong ngi samla pule na ka jaitbynriew Khasi hynrei ki dei ruh ki mat kiba ktah ïa baroh ki samla pule na kiwei ki jaitbynriew kiba pule ha NEHU. Nga kyntu ïa baroh ban ïasnohkti lang bad ka KSU NEHU na ka bynta ka jingshah thngan khlem pud,” u la ong.
Shwa kanekane ki samla pule ki la pynlong ïa ka jingïaid paidbah naduh Central Library haduh Administrative Block ban aiti ïa ka thup jingdawa sha u VC.
Kine ki mat ki kynthup ka jingrem ka bai Hostel, ka jingbym biang ki Hostel, ka jingdawa ban weng kam ïa u Registrar, Deputy Registrar bad kiwei ki ophisar ba shu thung beaiñ da u VC ka NEHU bad ban dawa ban thung mardor ïa u Pro-Vice-Chancellor.
Ïa kane ka rally la pynlong da ka seng samla pule ka Khasi Student Union (KSU) NEHU Unit bad ka NEHU Student Union (NEHUSU).
