Shillong, Naiwieng 8 : U President jong ka Khasi Students Union u samla Lambokstarwell Marngar u la kynthoh tyngeh ia u Vice Chancellor jong ka skulbah North Eastern Hill University u Prof. PS Shukla da kaba kynnoh ba kum u khlieh nongpyniaid ia ka skulbah u shu sngap kuman bad u la pyrshang ban thet kti ia kiei kiei baroh kat haduh ba ka la poi haduh u pud ba ki samla pule kin da shong shah thngan hakhmat ka ophis treikam jong u Vice Chancellor kaba dang iai bteng haduh mynta.
Kane ka jingkynthoh jong une u nongialam ka KSU ka long hadien ba ki la don lai ngut ki samla pule jong ka skulbah NEHU kiba la kem pang na ka jingshah thngan ba khlem pud sngi ba la khot pynlong da ka North Eastern Hills University Students Union bad ka KSU NEHU Unit kaba la sdang naduh ka 5 tarik u Naiwieng 2024.
Ha ka jingiakren bad u nonglum khubor jong ka Batesi TV hadien ka jingleit jngoh ia ka samla Naphisabet Marwein, ka samla pule jong ka skulbah NEHU kaba la shah sumar ha Civil Hospital, Shillong ha ka 8 tarik Naiwieng, 2024 u samla Lambokstarwell Marngar u la ong ba seng ka la peitngor bha miet la bad sngi ia ka jingiakhih jong ki samla pule bad lada donkam ka seng kam banse ban tuklar ia ka jingpynking klong jong uwei u briew ia ka skulbah NEHU.
Ha kane ka jingshah jingit jong ki samla pule ka KSU ka la pyntip ba u General Secretary ka KSU NEHU Unit u samla Kevin Wanrap bad u samla Morningstar Suting uba dei u dkhot jong ka KSU NEHU Unit ruh ki la shitom jur bad la pynkit ia ki sha Civil Hospital Shillong ha ka janmiet sngi Thohdieng ka 8 tarik Naiwieng, 2024.
