Shillong, Naiwieng, 09: Ki nongïalam jong ka Khun Hynñewtrep National Awakening Movement (KHNAM) State Youth Wing, ka Federation of Khasi Jaiñtia and Garo Peoples (FKJGP) Central Body, ka Ambedkar Students’ Association (ASA), ka Jaintia Students Union (JSU) bad ki nongïalam jong ki shnat treikam bapher bapher ka KSU ha ka sngi Saitjaiñ ki la leit jngoh ïa ki samla pule jong ka skulbah North Eastern Hill University (NEHU) kiba pynlong ïa ka jingshah jingit mynta la palat 90 kynta ne saw sngi kynthih.
Ka jingïakhih ba la khot pynlong da ka NEHUSU bad ba la kyrshan lang da ka KSU NEHU Unit ka long ban dawa ba dei ban weng kam mardor ïa u Registrar u Omkar Singh bad ïa u Deputy Registrar (Academics) u Amit Gupta. Kine ki ar tylli ki kynhun jong ki samla pule ki la dawa ruh ïa u Vice Chancellor jong ka skulbah NEHU ban hiar shuki noh mardor.
Ha u kyrwoh ba la phah sha ki lad pathai khubor, ka FKJGP ka ai ka jingkyrshan ba pura ïa ka jingdawa bad ka jingïakhih jong ka NEHUSU bad ka KSU NEHU Unit bad ka seng ka kitbok kitrwiang ba kane ka jingdawa kan poi sha ka thong.
Ka Seng ka la ai mynsiem ruh ïa baroh ki samla pule kiba la shim ïa ka sienjam ban shah jingit khlem buh por da kaba pynpaw ruh ha ki nongïalam jong ka NEHUSU bad ka KSU NEHU Unit ban ïai don ha syndah jong ki khnang ban pynurlong ïa ki jingdawa.
“Ka FKJGP ka pynpaw ïa ka jingsngewdiaw ha kaba ïadei bad kane ka jingjia ha kane ka skulbah ha kaba ki samla pule kiba long ka lawei na bynta ka jaidbynbriew ha ka jaka ba kin shong ha ki kamra class ban ïoh ka jingnang jingstad hynrei da ka jingleh donbor jong u Vice Chancellor kim banse ban shong sha thngan khlem sangeh,” ong u kyrwoh na ka seng.
Ha ka jingleit ai mynsiem ïa ki samla pule kiba shah thngan, la lamkhmat da u Asst. Secretary ka FKJGP Seng Kmie u u samla Reginald Thabah ryngkat lang bad u President ka Shillong City u Bah Arkin Field Khonglam bad kiwei kiwei ki nongïalam ka seng.
Ki dkhot jong ka Ambedkar Students’ Association (ASA) kiba la leit ai mynsiem ïa ki samla pule ka skulbah NEHU ha kane kajuh ka sngi ki la ong, “ngi pynrem jur ïa u Vice Chancellor namar ka jinglong pyrshah riewlum kaba long kum ka jingibeiñ ïa ka jingleh hok. Ki nonghikai bad ki samla pule ki la kynnoh ba tang khyndiat ngut ki trai jylla la thung kam nonghikai bad nongtrei hapoh ka Campus ha ka samoi jong une u VC ba mynta.”
“U VC u la leh kuman da kaba thungkam ïa ki ophisar ki bym don jingnang jingtip eiei. Kane ka long kum ka jingleh beiñ ïa ka skulbah kaba dei hok ban pynmih ïa ka jingdawa ba shongnia. Ngi kyrshan ïa ka jingdawa jong ka NEHUSU bad ka Khasi Students’ Union (KSU) NEHU Unit ban weng kam ïa u VC, ïa u Registrar bad ïa u Deputy Registrar,’ la pynpaw shuh shuh ka ASA.
“Ngi kyntu ïa ka Sorkar ba kan sa bishar bniah ïa ka jingthungkam kaba la jia ha ka samoi treikam jong une u VC ba mynta bad ngi dawa ba dei ban thung noh mardor ïa ki Pro-VC jong ka Shillong bad ka Tura Campus ban pynurlong ïa ki jingdawa jong ki samla pule,” la bynrap ka ASA.
Ka Jaiñtia Students Union (JSU) ba la lamkhmat da u General Secretary u samla Trebor Suchen ha ka jingleit jngoh ïa ki samla pule jong ka skulbah NEHU ha ka miet sngi Thohdieng ki la ai jingkyrshan pura ïa kane ka jingïakhih bad kitbok kitrwiang ba ki samla kiba shah thngan kin ïohbor ban bteng ïa ki jingshah thngan tat haduh ba ka jingdawa kan sei soh.
U President ka KHNAM State Youth Wing u Bah Joseph H. Pyngrope ha ka jingleit jngoh ïa ki samla pule ka skulbah NEHU u la ong ba ka seng ka ai jingkyrshan pura ïa ka jingïakhih jong ki samla pule bad ha kajuh ka por u la pyntip ba ka KHNAM ka la phah ïa ka jingthoh sha u Lat ka Jylla ha ka sngi Thohdieng ba un tuklar lem ïa kane ka jingeh jong ki samla pule bad kyrpad ruh ïa ka Sorkar Jylla ba kan phaikhmat sha kine ki samla.
