Shillong, Naiwieng, 12: Uwei u nongñiah trok ïa uba la ithuh kyrteng kum u Bah Hanpaïa Laloo na ka shnong Nongrynkoh, West Jaintia Hills District, ula mynsaw jur na ki bynta jong ka kjat hadien ba ka trok kaba u ñiah ka la ïatakhuh bad kawei pat ka trok kaba pynieng harud surokbah National Highway-6 ha ka shnong 12 Mer, Ri Bhoi District.
Katkum ka jingïathuh jong ki Pulit, kane ka jingjia, ka la jia ha ka por kumba 4:30 baje mynstep ka sngi Baar katba u Bah Hanpaïa uba ñiah ïa ka trok kaba don ïa u nombar ML11 A1436, u dang thmu ban leit sha Guwahati. Hynrei ynda poi ha ka shnong 12 Mer, ka kali jong u ka la ïatakhuh bad kawei pat ka trok kaba don ïa u nombar NL01 AD5135, kaba pynieng harud surok National Highway ba la ñiah da u Bah Neverson Shadap.
Tang shu ïoh jingtip halor kane, ki Pulit ryngkat ki Pulit na ka tnat Fire & Emergency Service, ki la lah ban sei ïa u Bah Hanpaïa uba la sahkut hapoh ka kali kaba la julor bha na ki bynta ba shakhmat hadien ka jingtrei shitom kaba la neh haduh ar kynta eiei.
Ïa u Bah Hanpaïa la pynkit noh sha Guwahati Medical College & Hospital na ka bynta ban ïoh ïa ka jingsumar.
