Shillong, Naiwieng, 13: Haduh 90.84 percent ki paidbah ki la thep ïa ka vote ha ka elekshon shiteng samoi jong ka Gambegre Assembly Constituency, West Garo Hills District kaba la long ha ka sngi Balang.
U Chief Electoral Officer (CEO) ka Jylla u BDR Tiwari ha ka jingïakren bad ki lad pathai khubor u la ïathuh ba ka jingthep vote ka la long kaba ïaid beit ïaid ryntih.
Ka jingpoi ki nongthep vote ha ka elekshon MLA ha u snem 2023 ka long 90 percent.
U la ong ba ki don haduh 33,088 ngut ki nongthep vote, kata 16,881 ngut ki shynrang bad 16,207 ngut ki kynthei kiba la pyndep ïa ka hok jied nongmihkhmat ha ki 51 tylli ki Polling Station.
U la pyntip ba ki Service Voter ki don lai ngut, 15 ngut kiba tymmen ki kro bad 17 ngut ki briew ba don jingduna ha ki dkhotmet ki la thep ïa ka vote na ingsah lajong.
Namar ka jingpoi pura jong ki nongthep vote baroh shisngi, ha ki 51 tylli ki polling station jong ka Constituency, la lah ban pyndep ïa ka jingthep vote haduh ka por 6 baje janmiet.
Ka Sanjengpara Polling Station ka dei kaba poi bun bha ki nongthep vote kaba kot haduh 95.60 percent
U CEO u la ïathuh ba la bujli hynriew tylli ki VVPAT ha ki san tylli ki Polling Station.
Ki don hynriew ngut ki kyrtong kiba ïakhun ïa kane ka elekshon shiteng samoi ba kynthup ïa ka Dr Mehtab Chandee A Sangma na ka National People’s Party (NPP) kaba dei ka kurim jong u Myntri Rangbah ka jylla u Conrad K. Sangma, u Jingjang M. Marak na ka Indian National Congress bad ka Sadhiarani Sangma na ka All India Trinamool Congress (AITC), bad u Bernard N Marak na ka BJP.
Arngut ki kyrtong Independent ki long u Sengkrabirth M. Marak bad u Jerry A. Sangma.
Ka jingpynlong ïa ka elekshon shiteng samoi ka long hadien ka jingresaiñ noh jong u nongïalam ka Congress u Saleng A. Sangma hadien ka jingshah jied kum u MP ba thymmai jong ka Tura.
U CEO u la pyntip ruh ba la ïoh kurup T. 12.72 lak ka pisa tad haduh ka sngi thep vote. Na kane, 1.79621 lak ka pisa, 2.09945 lak ka kiad, 2.40 lak u drok bad 5.4248 lak kiwei kiwei ki jingai sngewbha.
