Shillong, Naiwieng, 14: Ka Ministry of Education ka Sorkar India ha ka sngi Palei ka la thung da ka komiti kaba kynthup arngut ki dkhot ban tohkit halor ka jingkynnoh ba don ka jingpynïaid bakla bad ka jingbym lah ban pynïaid ïa ki kam hapoh ka skulbah North Eastern Hill University (NEHU).
Ïa kane ka rai la shim hadien ka jingïakhih shah thngan ba khlem pud sngi ba la lamkhmat da ka North Eastern Hill University Students Union (NEHUSU) bad ba la kyrshan da ka Khasi Students’ Union (KSU – NEHU Unit) mynta la shiphew sngi kynthih, kiba dawa ban weng mardor ïa u Vice Chancellor u Prof P.S Shukla, ïa u Registrar u Omkar Singh bad ïa u Deputy Registrar u Amit Gupta.
Ha ka hukum ka Ministry ka ong, “halor ki jingsngewkhia ba la pynpaw da ki samla pule, ki seng samla pule, bad ki khubor ha ki lad pathai khubor, ka Ministry of Education ka la rai ban thaw ïa ka komiti ka ban tohkit halor ka jingkynnoh ba don ka jingpynïaid bakla bad ki jingbymlah treikam hapoh ka North Eastern Hill University (NEHU), Shillong.”
Ka la ong, hadien ba la mih ki jingkynnoh la pyntip sha ka Ministry halor ka jinghiar kyrdan jong ka skulbah, ki jingthung kam be-aiñ, ka jingbym shimkhia ïa ki jingdonkam hapoh ka skulbah bad ka jingbym shimkhia jong u Vice Chancellor.
La kynnoh ba ka kyrdan jong ka skulbah ka la hiar arsut ha ka jingbuh kyrdan da ka National Institutional Ranking Framework (NIRF), ïa kaba la kdew kti ba ka dei na ka daw ka jingleh bym suidñiew jong ki bor ba dei peit.
Ka Ministry ka la ïoh pdiang ïa ka jingkynnnoh ba la thungkam beaiñ kynthup ka jingthung kam ïa u Registrar bad ïa u Deputy Registrar, ïa kiba la kam ba ki long ki bym lah treikam hapoh ka skulbah bad ki khubor ba la pynsniew dur bad ka jingbym shimkhia ïa ki jingdonkam ba kongsan bad ki jingdonkam hapoh ka skulbah, kaba ktah jur ïa ka jinglong jingman jong ki samla pule bad ki jingdonkam ba manla ka sngi. Ka Ministry ka la ong ba ki la don bun ki jingujor bad ki jingthoh na ki seng samla pule, kynthup ïa ki jingdawa ban pynkylla ïa ki jingdonkam ba kongsan, ïa kaba la pyntip ba la shu sngap mynieh bad ieh bein da u Vice Chancellor.
“Namar kine ki jingkynnoh haneng, la pyntip hangne ba la thung ïa ka komiti jong ki arngut ki dkhot ban pynlong ïa ka jingtohkit kaba bniah halor kane. Ka komiti ka kynthup ïa u Prof DP Singh, uba dei u Chairman jong ka UGC kum u Chairman jong ka komiti bad u Prof Dilip Chandra Nath, u Vice Chancellor barim ka Assam University,” la pyntip ka hukum.
La bthah ïa ka komiti ban tohkit halor kine ki jingkynnoh bad ban phah ïa ka kaiphod hapoh 15 sngi naduh ba la pynmih ïa kane ka hukum, ryngkat bad ki jingai jingmut ba kongsan na ka bynta ban dup lah ban pynbeit ïa ki kynrum kynram.
Ka Ministry ka la bthah ruh ïa ki bor pynïaid jong ka skulbah ban ai jingkyrshan pura ïa ka komiti bad ban aiti ruh ïa ki dulir ba kongsan bad ka jingïarap haba donkam katba dang ïaid ka jingtohkit.
