Shillong, Naiwieng, 15: Ki samla pule bad ki nonghikai jong ka skulbah North Eastern Hill University (NEHU) ha ka janmiet sngi Thohdieng ki la pdiang burom ïa u Senior-most Professor jong ka skulbah NEHU u Prof. N. Saha ban shimti shipor kum u Vice Chancellor Incharge hadien ba u Vice Chancellor u Prof. PS Shukla u la shim shuti.
U Prof. PS Shukla u la shim shuti Earned Leave (EL) ha ka 15 tarik mynta u bnai bad pyntip ruh ba un dang bteng ban shim shuti biang naduh ka 17 tarik naduh haduh ka 29 tarik mynta u bnai bad ong ruh ba un dang pynjlan shuh shuh ïa ka jingshim shuti lada donkam.
Hadien ka jingïalang kaba lyngkot, ki nonghikai bad ki samla pule ki la ïalam ïa u Prof. Saha sha ka ophis treikam jong u Vice Chancellor ban peit ïa ka skulbah na ka bynta shipor.
U Prof. Saha haba kren ha kane ka jingïalang u la ong, “kumba phi ïohi ba u Vice Chancellor ula shim shuti 15 sngi naduh mynta ka sngi bad kum u Senior-most Professor bad katkum ka NEHU Act, Ordinance and Statutes nga la hap ban shimti kum u VC Incharge jong kane ka skulbah. Ngam don lad shuh da kumwei pat hynrei nga hap ban shimti kum u VC Incharge.”
“Nga ruh nga la long teng u samla pule jong kane ka skulbah naduh u snem 1980. Nga la shakri kum u nonghikai la 37 snem hangne. Nga la ïohi ïa ki bynta kiba bha bad ki bynta kiba sniew hapoh kane ka skulbah. Kane ka long kaba pynpang mynsiem ïa ngi,” ong u Prof. Saha.
“Ngan pyrshang ha ka bor jong nga da ka jingïatreilang bad ki samla pule bad ki nonghikai bad ki nongtrei. Ïa kino kino ki jingeh watla nga ïoh tang khyndiat ka iktiar ngin ïa pyrshang ban weng ïa kine ki jingeh. Nga kyrpad nyngkong eh ïa ki samla pule ba kin pynkut noh ïa ka jingïakhih shah thngan namarba mynta phi don hapdeng ki jingpang jingshitom ha ka bormet. Ka long kaba sngewsih haduh katta katta bad mynmiet ngim nang ïoh thiah haba ngi ïohi ïa ka jinglong jingman jong phi ki samla pule ba phi shah ïa ka jingthngan bad ka jingkhriat,” ong u Prof. Saha.
“Ïa ki jingeh ngin pyrshang ban weng suki pa suki namarba ngin yn lah ban shu leh lut tang hapoh shi sngi,” la kular u Prof. Saha.
Haba kren ha ka jingïalang, u General Secretary jong ka NEHUSU u samla Toniho Kharsati u la ïathuh ba u President ka Union uba dang don mynta hapdeng ka jingshah sumar ha Critical Care Unit, Shillong Civil Hospital u la phah ïa u kyrwoh ban dang bteng ïa ka jingïakhih shah thngan namarba u Vice Chancellor u la ïaid lait ïa ka rai jong ka Ministry of Education, Sorkar India da kaba shim shuti hi da lade khlem da pyrkhat shuh ïa ki kynrum kynram kiba jia hapoh kane ka skulbah.
“Ka jingïakhih kan nang kham jur shuh shuh bad ngi kum kawei ka kynhun bad kawei ka sur ngi kyrmen ba kan ym long lehnohei da ka jingshim shuti jong u Vice Chancellor. Ngin dang ïai bteng beit ïa ka jingïakhih shah thngan, tad haduh ba ngin da ïohi ïa ka jingbthah kaba shai na ka Sorkar ba ka la weng ïa u Vice Chancellor na kane ka skulbah,” la pynbna u samla Kharsati.
U President ka NEHUTA Prof. Lakhon Kma u la ong, “ngim lah ban pdiang ïa ka jingpynshai jong u Vice Chancellor bad hakhmat jong ngi, u dei u briew uba ngi la kyntait. Kumno un shu thung ïa ki Pro Vice Chancellorï Hynnin ka sngi u la pynlong ïa ka jingïalang Executive Council da kaba shu leh Online.”
U la ïathuh ruh ba u Registrar uba la shim shuti bad uba la dei ban wan phai sha ka kam ha ka sngi Palei u la shu phah ïa ka shithi ha WhatsApp ba u la leit trei.
“Kane ka long kaba be-aiñ. Haduh mynta ka sngi u don shabar bad u Vice Chancellor Incharge u dei ban leh da kaba tyngeh ïa u Registrar. Um lah daleilei ruh em ban ong ba u la wan phai sha ka kam da kaba shu pyntip Online. U Vice Chancellor bad u Registar baroh arngut ki phetrieh. Ki pyrshang ban shu pynïaid ïa ka skulbah na WhatsApp. Ki pyrshang ban pynkylla ïa ka NEHU kum ka WhatsApp University. Kine ki arngut ki jakor, ki la pynkylla ïa kane ka skulbah sha ka WhatsApp University ïa kaba ngin ym ailad daleilei ruh em,” la kynthoh u Prof. Kma.
U la ong ruh ba ka jingshim shuti jong u Prof. Shukla kan dei ruh ka jingkut syndon jong u ban long u Vice Chancellor ha skulbah NEHU naduh kane ka sngi.
