Kyrsoibor Pyrtuh
U Eklesiastis shi sien u ong, “Don ei ei kaba ki briew ki ong, Ha khmih kane ka long kaba thymmai? Ka lah long lypa ha ki rta shuwa ïa ngi.” Kine ki kyntien ki pynkynmaw ïa ka jingshisha ba ka jingim briew ka tyllun kum ka shalyntem hangne ha sla khyndew. Ym lah ban len ba ki don kiei kiei kiba ym lah ban pynkylla ha ka jingim, hynrei u snem ba thymmai barabor u wanlam ïa ki jingshem kiba thymmai, ki lad ki lynti kiba thymmai bad u wan ryngkat ruh bad ka jingtieng ne ka jingartatien ban ïaid ïa ka lynti kaba ym pat ju ïaid. Kumne haba sdang jong ka snem thymmai to ngin ïeng pyneh rngiew bad kut jingmut ban kamai ïa ka hok bad ban im tip briew, tip blei.
Kiei kiei kiba la rim pyrshah ïa kiei kiei kiba thymmai: Naduh kumba 25 snem tam mynshuwa, ka sermon jong u S. J Samartha, uwei na ki theologian Khristan jong ka Ri India, ka bat sah bad ïai tyndung ïa ka jingmut jingpyrkhat jong nga haduh mynta. Ha kane ka sermon u S. J Samartha u ïaksaid halor kane ka jingkylli, Hato don ei ei kaba ngi lah ban ong ba ka dei kaba thymmai? Hato ka jingim kam dei kajuh, kaba lah long lypa ha ki spah snem kiba la leit noh? Haba u sam ïa kane ka sermon hapdeng ki khynnah skul kynthei jong ka Bishop Cotton Girls’ School, Bangalore, ha ka lyiur jong ka snem 1981, u S. J Samartha u ong kumne, “Ha ka jingim ngi leh ïa kajuh shi kajuh manla ka snem. Hynrei ym lah len pat ba ki kam ki plih, ki janai bad ngi lah ban pynthymmai da kaba ngi ïai leh ïa kajuh bad kumta ngi im bad san ha ka jingim. Ka jingleh jong ngi ïa kijuh ki kam ka mut ba ki kam ki ïai bteng na ka pateng sha ka pateng, nangta ki kam ki skhem bad ki plie ruh ïa ki lad ban san ha ki jingtreikam. Kumta ka mynnor ne ki kam kiba ngi ju leh na ka snem sha ka snem ki don ka jaka kaba kongsan ha ka jingim bad ki ai ha ngi ka nongrim ne ka tynrai, lym kumta ka jingim jong ngi kan sakma bad jah lynti”. Ha kajuh ka por u S. J Samartha, u phnieng ïa katei ka nia da kaba ong, “Ba ki kam ne ki jingleh kiba la ju leh ha ka mynnor ki kylla satah bad kim ai jaka ïa kiei kiei kiba thymmai. Ym don jaka ïa ki jingmut ne jingshem ne jingtip kiba thymmai ha ki kam ne jingtrei kiba la rim. Bunsien ki jingmut ne ki jingshem kiba thymmai ki shah kyntait noh na ki jaka ne ki jylli treikam kiba rim. Kumjuh ruh, ki ‘tien phira kiba rim bad ki bym larkam shuh, ki jingleh jingkam kiba rim ne ki niam ki rukom kiba rim ki bym phoida ei ei kim ailad satia ba ki phlang jyrngam jong ki jingmut, ki jingstad bad jingtip ba thymmai kin san kin mer.
Ka Baibl ha ka Kitab Bathymmai ka kren shaphang ka jingthaw kaba thymmai bad ba kaba rim ka la leit noh bad hakhmih kaba thymmai ka la jia long. Kine ki dei ki kyntien kiba ai jingkyrmen bad kiba kyntiew ïa ka jingangnud jong ki khun bynriew ban ïai pynthymmai ïa ka jingim bad ban ïaid shaphrang. Hynrei nga kubur bad u S.J Samartha haba u ong ba ka Baibl kam dei tang ma ka, ka Kot Bakhuid kaba lah ban ai jingkyrmen ïa ki briew, hynrei ki don kiwei de ki Kot Bakhuid jong ki niam ne kynhun jaitbynriew bapher kiba don ha ka Ri kiba ai jingkyrmen ïa ki briew. Kumta ha ka Ri India, ka Ri kaba ki nongshong shnong ki im bad don ha la ka jong ka jingngeit ne ka niam ka rukom ne ka kolshor, ka long ka jingbeiñ Blei ne ka jingpynkheiñ aiñ ban ong ba don tang kawei ka kynhun niam ne tang kawei ka Kot Bakhuid, kaba don lut ki jingtip bad jingshisha kiba tei ïa ka jingim bad ïa ka imlang sahlang.
Ka jinghikai shaphang ka jingim kaba thymmai ka shat phalang lyngba ka jingim u Jisu Khrist, uwei na ki nonghikai uba khraw, ba ka Ri Palestine ne ka imlang jong ki Arab bad Jiw ka la sei madan. U Jisu um shym la kyntait mardor ïa kaba rim, pynban halor kaba rim u la ïalap shaphang ka jingim bathymmai, u la buh jingkylli bad kynthoh ïa ki jinghikai niam, ïa ka imlang sahlang bad ka synshar khadar jong ka juk ba u im. U kdew bad pyni da ka lynti kaba thymmai bad u thaw ïa ka kynhun ne ka imlang sahlang kaba thymmai. Hangne mynta yn sot ïa ki katto katne ki jinghikai kiba kordor jong U kiba lah ban wanrah ïa ka jingkylla bad ban pynthymmai ïa ka jingim- “Phi la ïohsngew ba la ong, Men ieit ïa u paramarjan, men shun ruh ïa uba shun ïa me. Hynrei nga ong ha phi. To ieit ïa kiba shun ïa phi” Ka hukum kaba ar ka long-Men ieit ïa u/ka paramarjan jong me kumba ïa lade…Namar nga la thngan te phi la ai ha nga ban bam: nga la sliang te phi la ai dih ïa nga: nga la long nongwei, te phi la khot lem ïa nga: Ko Trai mynno ngi la ïohi ba me la thngan; bad ngi la ai bam lane ba me la sliang, ba ngi la ai dih? Mynno ruh ba ngi la ïohi ba me la long nongwei bad ngi la khot lem ïa me? Shisha nga ong ha phi. Ha kaba phi la leh ïa ka ha uwei na uba rit tam na kine ki para jong nga, phi la leh keiñ ïa nga.” Hato ngi nud ma ban im katkum ki jinghikai jong ki riewkhuid, ki prophet ne U Messiah kiba la hikai ïa ngi shaphang ka hok bad ka jingshisha. Ki jinghikai jong ki, ki la lah ban wanrah ki jingkylla kiba radbah ha ki hajar snem kiba la leit noh bad ki dang treikam haduh mynta. Phewse, kane ka pateng ka ñiew beiñ bad kheiñ dewthala ïa ki prophet bad ïa u Messiah.
Kaei kaba ap ïa ki nongshong shnong jong ka Ri ki Lyoh?: Kumba ka ju long hi, ki kam lehkmen leh risa ha kane ka ri jong ki Lyoh ka neh bad bteng haduh ki taïew kiba kut jong u Kylla Lyngkot bad ka lah ruh ban bteng shaduh u bnai Rymphang, khamtam ka snem 2025 ka ïalyngkhuh bad MDC elekshon. Kane ka shnong kam ju kyrduh ha ki kam sngewbha. Ki don ki jinglehkmen lehsngewbha kiba ïoh maphot, hynrei ki don ruh ki jait jingleh sngewbha kiba hap ban siewdor haduh ban da khlieng ki pla pisa bad kiba bun bah ki nongshong shnong kim kot bor. Ki jinglehkmen leh risa kiba la long bad ki ban sa long ki dei tang ki dur bula bad kim ïathuhkhana ïa ka jingshisha ka jinglong jingman bad ka jingim ki briew hapoh ka Jylla. Ka jingshisha pat ka long ba kiba bun ki nongshong shnong jong ka Jylla Meghalaya ki im syrtok hapdeng ka jingduk bad kim donbor, kim don pisa ban thied wat tang ïa ki jingdonkam kiba kongsan ha ka jingim, kum ka jaiñ, ka bam bad ki dawai. ñiuma, ka jingwan ki nongjngoh kai pyrthei ka kiew bha ha kine ki khyndiat por bad kane kan ym lah ban kyntiew ne pynmyntoi ei ei ruh ïa ki nongshong shnong lymda ka Sorkar ka thaw ïa ki policy kiba biang kiba lah ban kdup bad kynthup lang ïa baroh ha ka roi ka par bad khamtam eh ïa kiba duk, kiba kyrduh bad kiba tlot bor ha ka kamai kajih.
Ngi ai wai snem/Ngi die duh: Ka long kaba phylla ba ym don ba pynleit jingmut than halor ki katto katne ki aiñ bad ki policy jong ka Sorkar Meghalaya kiba la mih pyrthei dang shen. Ka Sorkar Meghalaya ka la rai ban kyntiew ïa ka snem ai wai ïa ki khyndew sorkar na ka 30 sha ka 60 snem, nangta ka la thaw ruh ïa ka Invest Meghalaya Authority (IMA), ka tnat treikam jong ka Sorkar ka ban khmih ïa ki kam thied khyndew bad pynïaid ïew ïa ka khyndew sha ki nongkhaïi kiba wan ban seng kam ne seng kharkhana hapoh ka Jylla bad la pynlong aiñ ïa ka Meghalaya State Investment and Promotion and Facilitation Act 2024. Ka long kaba sngewsih ruh ba ha ka Jylla Meghalaya kam ju don ka jingkynjoh ktien ne ka jingïatai nia paidbah ïa ki aiñ rew ne ki policy kiba ktah ïa ka kamai kajih, ka ïoh ka kot bad ka im ka ïap jong ki paidbah, ha shuwa ban thaw ne pyntreikam ïa ki. Kane kam long kaba bha ïa ka synshar khadar bad ka pynpaw ïa ka jingmeng bad ka mynsiem bym don jingkitkhlieh jong ki nongsynshar. Na ka por sha ka por ka Sorkar Jylla ka kam ba ka leh ïa kane na ka bynta ka roi ka par, ban khring ïa ki nongsengkam bad ban plie lad ïa ki samla ban ïohkam ïohjam. Hynrei kata ka roi ka par kaba kumno bad kaei ka dor kaba ngi hap ban siew ne ïa-peiñ?
Lyngba ka Invest Meghalaya Authority bad ka Aiñ ne policy kaba thymmai kata, ka Investment Promotion law/policy, ka Sorkar Meghalaya ka la kut jingmut triang ban thaw ïa ki lad ban kynshew khyndew ne ban thaw ïa kita ki land bank bad ban pynsuk ïa ki nongkhaïi bad ki heh saipan ban seng kam hapoh ka Jylla. Hooid, ym don mano mano ruh ban ong da kumwei pat, ka Jylla Meghalaya ka donkam ïa ka roi ka par bad ban thaw lad thaw lynti ïa ki samla ban ïohkam ïohjam. La pynshong nia ba ka jingthaw ïa ki land bank ne ka jingkynshew khyndew da ka Sorkar kan pynmyntoi bad plie lad ïa ki trai ri ban seng kam seng jam, ban pynkhraw ïa ka rep ka riang ne ki kam jngoh kai pyrthei bad kumta yn plie lad ïa shibun ki samla wad kam bad ki trai ri ban ïeng ha la ki jong ki kjat. ñiuma, kat kane ka kam thied bad kynshew khyndew, ym lah ban shu ïeh tang ha ka Sorkar khlem da ïakren-ïatai bad ïarai lang da ki Dorbar Shnong, ki riew paidbah bad ki nongshong shnong. Kumta ki Dorbar Shnong, ki sengbhalang, ki kynhun jong ki nongïakhih paidbah bad ki nongshong shnong ki dei ban dawa ba ka Sorkar ka dei ban pynmih paidbah ïa ki kot ki sla, ki bui, ki rai bad ki jingkynthoh jong ki tnat Sorkar bad bym dei Sorkar halor kane ka kam.
Haba ïada bad kyrshan ïa ka rai jong ka Sorkar Jylla, u Bah Paul Lyngdoh uba long u Myntri ka tnat Tourism, u la kynthoh ba ki Sengbhalang ki dei ban ai jingmut kumno ban kyntiew ïa ka ïoh ka kot ne kumno ban thaw ki lad ai kam ai jam. “Ban shu pyrshah bad ban shu ong beit Em kam long”. Ka long kaba suk ïa u Myntri Sorkar, uba don lut ïa ki jingtip ha ki kti jong u halor kane ka kam, ban kynteit ne ban shop sharud ïa ki jingkren ne jingkdew ne jingkynthoh jong ki Sengbhalang. Ha kawei pat ka liang ki don ruh sa kiwei ki kynhun ne nongshong shnong kiba dang wad jingtip kham bniah lyngba ka RTI Act, halor kata ka IMA bad ki Land bank bad ka tnat Sorkar kaba dei khmih kam pat shym la ai lut ïa ki jingtip. Ngi sngewthuh ba u Bah Paul Lyngdoh kum u Myntri bad nongaiktien jong ka Sorkar u hap hi ban pynksan ïa ki rai jong ka Sorkar Jylla. Ha kajuh ka por pat, u don ruh “u Paul Lyngdoh” uba shisien ha kawei ka por u la ïoh ka jingieid bad jingshaniah jong ki khun ka bri u Hynñiewtrep bad u la ju maham tyngeh bad ïathuhlypa halor ki Lum Khasi ïa ki jingma kiba ap ïa ka Ri lyngba ka poitri kaba pawnam jong u kaba u la jer kyrteng, Ban Die- “Kane ka Ri b’la mong, ba set slung ïalade ryngkat ka dewmet jong ka ba pun da spah, ki marpoh khyndew bakorkor, ki kynbat dawai bad ki tiewkhlaw ba ñiar ban shem, bad ki dieng, bad ki lyngkha bad ki um, kine baroh bad kiwei de…Ym donkam contact number. Ki agent jong ngi ki don kylleng kylleng.” (La sot na ka Souvenir, Khasi Students’ Union 20th Anniversary Celebration 1978-1998).
La sngewthuh ba ki seng ne kynhun, kum ka Khasi Students Union bad kiwei kiba dawa ba dei ban ïatai bad pyrkhat bniah ha shuwa ban thaw ne pyntreikam ïa ka IMA ki la dep lum jingtip bad pynkhreh ïa ki jingai jingmut bad ki jingdawa ban buh ha khmat jong ka Sorkar Jylla. Ym dei ban klet ba kita ki Land bank ne ka jingkynshew khyndew da ki bor Sorkar ka buh jingma ha kaba ki trai ri kin nang duh ka jinglong trai halor ka khyndew ka shyiap, khamtam lada kita ki khyndew kiba ka Sorkar ka thied ne kynshew ki dei ki khyndew kiba ïasnoh bad ka deiriti ne ki nongtymmen ne Ri Raij ne khyndew shnong ne khyndew kur. Kane kan wanrah jingeh bad kin mih ki jingïakynad hadien habud bad ka jingkylla phetwir jong ki trai ri. Kino kino ki kam pynroi lyngba ki Land bank ki dei tang na ka bynta ka jingmyntoi ki nongkhaïi shimet ym na ka bynta ki nongshong shnong. Ha ki Ri ba la pyntreikam ïa kum kine ki policy ka long kaba shitom ïa ki trai khyndew ba kin ïoh biang ne kam trai biang ïa ki jaka hadien ba ka Sorkar ne ki nongkhaïi-nongsengkam kim pyndonkam shuh ïa ki.
Yn pynkut da kine ki kyntien jingrwai- “Jingkrenbeiñ bieit, hei! Ym don por, katba ki sngi ki nang ïaid;”
