Shillong, K’lyngkot, 06: Ka Synjuk ki Nongsynshar Shnong Par Umkhen (SNSPU) ka la byrngem ban pynthud beit ïa ka Public Hearing lada ka Sorkar Jylla kan pynlong da ka bor ha kaba ïadei bad ka jingthmu ban shna ïa ka jaka theh niut jong ka Shillong Municipal Board (SMB) ha u lum Sohlait ha ka shnong Nonghali.
Ha ka jingïakren bad ki lad pathai khubor ha ka Lah Sngi u Blei, u President jong ka Synjuk u Bah Super Rngaid u la ong, “ngim pyrshah ïa ka jingai jaka jong ki nongshong shnong jong ka shnong Nonghali hynrei ngi pyrshah ïa ka jingthmu ban shna ïa ka Waste Management Facility ha kane ka shnong namarba kan sa pynjajoh ïa ka Wah Umkhen.”
“Ngin ieng pyrshah bad ngin pynthud beit ïa ka jingpynsngew paidbah (public hearing) kaba ngi la ïoh jingtip wur wur wer wer ban pynlong ha ka 9 tarik mynta u bnai bad ngi dawa ïa ka Sorkar ba ka dei ban pynsangeh noh mardor ïa ka jingthmu ban pynlong ïa kane ka jingpynsngew paidbah. Hynrei lada ka Sorkar ka rai ban ïaid beit shakhhmat, ki nongïalam jong ki 15 tylli ki shnong kiba don hapoh ka Synjuk kin ieng pyrshah la ka long ha kano kano ka dur ruh,” ong u Bah Rngaid.
U la pynpaw ruh ïa ka jingsngewkhia halor ka jingpynmih khubor ha ka Social Media dang shen ha kaba u Sordar bad u Secretary jong ka shnong Nonghali ki la pynpaw ba ha ka jingleit jurip dang shen sha ka jylla Goa bad sha kiwei kiwei ki bynta jong ka ri India halor ka jingshna ïa ka Waste Management Facilities bad ba kan ym don jingktah eiei lada shna ïa kane kajuh ka jaka bret ñiut ha ka shnong Nonghali.
“Ka Synjuk ka pynrem jur ïa kine ki nongïalam jong ka shnong Nonghali bad kane ka jingpynmih ïa kane ka video ba la weng noh tang hapoh khyndiat kynta ka dei tang ka jingpyrshang ban ïalam bakla ïa ki paidbah ba kan ym don jingktah eiei lada shna ïa jaka bret ñiut ha ka shnong Nonghali,” la ong u President ka Synjuk.
U Bah Rngaid u la ong ba kane ka mat ka dei kaba la sah pongding la slem bha bad ki paidbah jong ki 15 tylli ki shnong kiba shong basah harud ka Wah Umkhen ki ieng pyrshah ïa ka jingpyrshang jong ka Sorkar Jylla ban shna ïa ka jaka bret ñiut ha ka jingjngai kaba tang 100 mitar na ka wah Umkhen.
Shuh shuh u la maham ba lada ka Sorkar kan pynlong da ka bor ïa ka jingpynsngew paidbah ka sorkar hi kan hap ban shim ïa ka jingkitkhlieh lada ka Synjuk kan pyni beit da ka bor ban pynsangeh ïa ka jingpynlong ïa ka jingpynsngew paidbah.
 | ReplyForwardAdd reaction |
