Shillong, K’ lyngkot, 09: Ki paidbah nongshong shnong jong ki 15 tylli ki shnong ka par Umkhen ha ka sngi Palei ki la mih ban pakhang lynti ïa ki bor Sorkar ban pynlong ïa ka jingpynsngew paidbah (Public Hearing) ha ka shnong Nonghali na ka bynta ban shna ïa ka jaka theh ñiut (Waste Management Plant) ha Lum Sohlait.
Kine ki shnong ki dei kiba don ha khappud jong ka East Khasi Hills, West Jaiñtia Hills bad ka Ri-Bhoi District bad ïa ka jingïakhih la lamkhmat da ka Synjuk ki Nongsynshar Shnong ka Par Umkhen.
Naduh ka por 8:00 baje mynstep ki paidbah ki la mih ban khang ïa ka surok da ki maw bad ki dieng hapoh ka shnong Jaroid, hashuwa ban poi sha ka jaka ban pynlong ïa ka jingpynsngew paidbah ha ka shnong Nonghali.
U President jong ka Synjuk Bah S. Rngaid u la ong ba ka jingpyrshah ïa ka jingpynsngew paidbah ban shna ïa ka jaka theh ñiut ka long namarba kam pat don ka jingïakren sngewthuh jingmut hapoh ka shnong ka thaw da kaba kynnoh ba ka dei tang ka jingleh dondor jong u Sordar ka shnong Nonghali.
Ïa kane ka jingpynsngew paidbah la pynbeit ban pynlong da ka Meghalaya State Pollution Control Board (MSPCB) hynrei ki ophisar jong ka Board, ki Magistrate bad ki bor Pulit ki la shah pakhang lynti naduh ka por mynstep ha kaba ki paidbah kiba pyrshah kim shym la ailad hi tdot ba kin leit sha ka shnong Nonghali.
Da kaba rah ïa ki plakad bad ki lama iong, ki paidbah kiba pyrshah ki la pynpaw ba ka jingthmu ban wanrah ïa ka jaka theh ñiut ha Nonghali kan sa pynjaboh ïa ka wah Umkhen kaba jngai tang kumba 100 mitar na ka jaka ba la thmu ban shna ïa ka jaka theh ñiut.
U Additional Deputy Commissioner jong ka East Khasi Hills District Bah PT Passah u la pyrshang ban pynsngewthuh ïa ki nongïalam jong ka Synjuk hynrei ki la pyneh beit triang khlem da ailad satia ban tur sha ka shnong Nonghali.
Tad haduh ka por janmiet, namarba ki nongpyrshah kim shym la ailad satia ïa ki ophisar ka MSPCB bad ïa ki Pulit ban leit sha ka shnong Nonghali kumta ki Magistrate ki la pynbna ba la pynsangeh noh shwa ïa ka Public Hearing bad la bthah ïa ki nongïalam jong ka Synjuk ba kin ïapynbeit bha ïa kane ka kam.
Ka la mih ruh ka thma ktien bad ka jingïakhynñiat hapdeng ka kynhun ki paidbah kiba pyrshah bad ka kynhun ki paidbah kiba kyrshan hadien ba ka kynhun kiba kyrshan ka la tur sha Jaroid namar ka jingbym ïohlad jong ka MSPCB ban pynlong ïa ka jingpynsngew paidbah.
Hynrei da ka jingdon jong ki Magistrate bad ki bor Pulit la lah ban tem ïa ka jingïakynroi hapdeng kine ki arliang mamla.
