Shillong, K’lyngkot, 10: San ngut ki riew pawkhmat na jylla Meghalaya ki dei kiba la shah jied ban leit peit ïa ka Republic Day Parade 2025 ha Kartavya Path, New Delhi, ha ka 26 tarik, Kyllalyngkot, 2025.
Kine ki long shi bynta ka kynhun ba kyrpang kaba kynthup 35 ngut ki nongmihkhmat na ka thaiñ shatei lammihngi, kiba pyni ïa ka jingnoh synniang kane ka thaiñ sha ka jingthmu na ka bynta ka Swarnim Bharat.
Haduh 10,000 ngut ki briew ki dei kiba la shah khot kyrpang na kylleng ka ri ban sakhi ïa ka Republic Day Parade 2025 ha Kartavya Path, New Delhi, ha ka 26 tarik u Kyllalyngkot, 2025.
Napdeng kine ki dei ki 35 ngut ki briew na ka thaiñ shatei lammihngi ba kynthup 8 ngut na Assam, 22 ngut na Sikkim bad 5 ngut na Meghalaya kiba la shah jied kum ki nongmihkhmat jong ka jingnoh synniang ka thaiñ na ka bynta ka Swarnim Bharat.
Kine ki briew kiba la shah khot kyrpang ki kynthup ïa ki longkmie ba seng kam lajong, ki nongjop National Award bad ki nongïoh jingmyntoi na ki skhim kyrpang jong ka Sorkar Pdeng. La peit bniah ban khot kyrpang ïa ki dkhot jong ki Self-Help Group (SHG) kiba trei ha ki kam kiba ïadei bad ka jingpynmih lad kamai jakpoh, ka jingïada ïa ka mariang, ka koit ka khiah, ka jingïoh ïa ka bam kaba tei, ka jingkhuid, ka jingpynïasoh ïa ki kynhun Panchayati Raj, bad ka jingpynkupbor ïa ki kynthei. La peit bniah ruh ban khot ïa kito ki briew ki bym pat ju poi sha Delhi.
Ha kane ka jingleit jong ki, kine ki nongshah khot kyrpang kin sakhi ïa ka Republic Day Parade bad kin leit jngoh ruh ïa ki jaka ba kyrpang kum ka National War Memorial bad ka PM Sangrahalay. Shuh shuh, kin ïoh ban ïakren bad ki Myntri Sorkar Pdeng ka ban pynïar ïa ka jingsngewthuh jong ki ïa ka hiar pateng jong ka India bad ki sienjam ba dang pyntreikam jong ka Sorkar.
