Khliehriat, K’lyngkot, 14: Ki Pulit jong ka Umkiang Patrolling Post, East Jaiñtia Hills District ha ka 11 tarik Kyllalyngkot 2025 ki la ioh ban kurup bad rah noh sha thanat ïa ki ar tylli ki motorbike kiba khlem trai kiba la shu iehnoh ha kawei ka jaka ba long khlaw ha kq shnong Wahkoh, Umkiang.
Ka khubor na ki Pulit ka iathuh ba ha ka por 4 baje mynstep, katba ki dang pynlong ïa ka jingiaid pahara ha ka thaiñ Wahkoh, kynsan kynsan ki la wan ar tylli ki motor bike na ka thaiñ Ratacherra bad kiba ñiah ïa kine ki motorbike ki la pynher stet haduh katta katta bad kane ka la pynsuba sniew ïa ki pulit.
Mar mar ki pulit ruh ki la beh thong da ka jingpyrshang ban pynsangeh hynrei ki nongñiah ar shaka ki la ioh ban phet krad da kaba shim kabu ïa ka jingdum ha ka por dang step phyrngap.
Ka jingtohkit halor kane ka dang iaid shakhmat.
