Shillong, K’lyngkot, 16: U Asst. Director jong ka tnat Sports and Youth Affairs ka Sorkar Jylla u la mudui da ka ejahar ha Sadar Police Station halor ka jingshah thombor jong kawei ka samla lud kaba la don 19 snem ka rta na kane ka jylla Meghalaua ha ki lai ngut ki runar ha nongbah Delhi ha ka 13 tarik mynta u bnai.
U Superintendent of Police ka East Khasi Hills Bah Vivek Syiem ha ka jingïakren bad u nongthoh khubor ha ka sngi Palei u la pynshisha ïa kane ka jingjia da kaba pyntip ba ïa ka Zero First Information Report la mudui sha ki Pulit da u Asst. Director jong ka tnat Sports and Youth Affairs ka Sorkar Jylla.
“Ngi la ïoh pdiang ïa ka Zero FIR na u Asst. Director halor kane ka jingjia ha Delhi bad la register case ruh ïa ka ejahar. Ka lanot ka la don shane (sha Shillong) mynta bad ngi ladep ban ïalam ruh ban leh ïa ka medical checkup. Ka jingtohkit hi ïa mynta kam pat sdang hynrei ngi dang shu pynlong ïa ka jingtohkit ba malu mala namarba ïa kane ka case yn hap ban phah sha ki Pulit jong ka nongbah Delhi,” la ïathuh u Bah Syiem.
Haba kylli, u SP u la ïathuh, ba ka lanot ka la leit sha Delhi bad ka kynhun ban ïashim bynta ha ka National Youth Day ba la pynbeit bad ïalam da ka tnat Sports and Youth Affairs ka Sorkar Jylla.
Katkum ka jingtip ba la ïoh lum na ki tyllong khubor la ïathuh ba ha ka Lah Sngi U Blei mynta ka taiew shwa ba ka kynhun jong ki samla kiba ïashim bynta ha ka National Youth Day kin wan phai noh sha Shillong, ki nongïalam ïa kine ki khynnah ki la ïalam ban leit thied leit pet sha dukan hynrei tang ka lanot kaba la pynpaw ba kan shong noh hapoh ka Hotel ba la pynsah na ka bynta ban khreh kot. Dei ha ka por ba ka dang don tang marwei hapoh kamra, lai ngut ki runar ki la rung jubor hapoh kamra ban thombor ïa ka.
Ïa kane ka jingjia, ha kaba nyngkong ka lanot kam shym la nud ban ïathuh ha ki paralok lane ha ki Official hynrei dei tad ynda haba ki la shong ha ka Train ban wan phai noh sha Shillong, ka lanot ka la phla ïa kane ka jingjia ha ki Official kiba la pyntip noh mardor sha Shillong.
“Ha ka jingshisha la dei ban ujor ejahar ha Delhi (namarba ka jia ha Delhi) hynrei namarba ka lanot ka la pyntip ynda la shong hapoh ka Train ki bor ba dei peit jong ka tnat Sports and Youth Affairs ki la pyntip noh ïa ka jingjia sha Shillong,” la bynrap u SP.
U SP u la ïathuh ba kane ka jingjia kan dang shimpor ban tohkit bad u la ong ruh ba mynta ka shong sa ha ka lanot ban ai ka jingïatreilang bad ki Pulit ka nongbah Delhi khnang ban ïoh kem ïa ki briew kiba donkti ha ka kam runar.
Haba kyntu ïa ki nongshong shnong ka jylla u SP u la ong, “ki briew kiba leit jingleit shabar la ka long kiba pule ne kiba leitkai ki dei ban da husiar bad ban da phikir haba ki ïakynduh ïa ki briew kiba bym ithuh. Kim dei ban shu ngeit biej katba ong ki briew bad lada ki don ka jingartatien ki dei ban telephone noh mar mar sha iing bad lada ki don kano kano ka jingsngew sheptieng ïoh ki shah ïalam bakla u don ruh u nombar 112 kylleng ka ri India bad lada phi don ha kano kano ka jaka ki Pulit ki la wan hi ban ïarap ïa ka jingeh jong phi.”
“Lada ki briew ki bym ithuh ki ai ïa kano kano ka jingbam phi dei ban kiar,” u la bynrap shuh shuh.
Haba kylli, u SP ula ong, “ngi ju buddien na ka por sha ka por (ïa kino kino ki jingjia) bad ka dei ka kamram jong ngi ban buddien haduh ba ngin da ïoh pynngat kyndon bad ban thwet haduh ban da lap ïa ki briew kiba donkti.”
