Shillong, K’lyngkot, 16: U Myntri Rangbah ka Jylla Conrad K Sangma ha ka sngi Palei u la plie paidbah ïa ka Rural Health Centre ha ka shnong Myrïaw, Eastern West Khasi Hills District ha ryngkat ka jingsakhi lang jong u Myntri ka Sorkar Jylla u Bah Shakliar Warjri bad u MP ka Rajya Sabha u Dr. W.R Kharlukhi.
Haba kren ha kane ka sngi, u Myntri Rangbah u la ong ba ka koit ka khiah ka dei kawei na ki tnat kaba ïakynduh jingeh bha ha ka jylla haba pynkynmaw ruh ïa ki jingtei ïa ki jaka sumar ha ki hynñiew snem ba la leit noh khnang ban pynsuk ïa ki paidbah ha ki shnong nongkyndong ban ïoh ïa ki lad jingsumar.
Da kaba pynpaw ba ka Sorkar ka la buh thong ban pynkylla dur ïa ka tnat ka koit ka khiah da kaba mang pisa kham bun haduh 9%, kaba heh tam ha ka ri, u la ong ba kane ka pynpaw shisha ïa ka jingkut jingmut jong ka Sorkar.
Ïa ka Rural Health Centre (RHC) la bei pisa na ka CMSDF ha ka jingkut kaba kot T. 38.8 lak, katba sa T. 38 lak yn sa pyllait noh shen.
Ka Myrïaw RHC kan ai jingshakri ïa ki 21 tylli ki shnong bad ba la pynïaid da ka Dr. H G Roberts Hospital, Shillong. Kane ka RHC kan dei kaba saw ba la pynïaid da kane ka hospital ha ka jylla.
U Myntri Rangbah u la ong ruh katba ka Sorkar ka dang trei la ka kamram, ka donkam ruh ïa ka jingïatreilang na ki shnong ki thaw bad ka kynhun kum ka Dr. H G Roberts Hospital, Shillong kan ai mynsiem shuh shuh ban wanrah ïa ka jingpynkylla dur ha ka koit ka khiah kaba pynïoh lut sha baroh ki nongshong shnong ha ka jylla Meghalaya.
Da kaba ïaroh ïa u synniang u bynhei jong ka Dr. H G Roberts Hospital, Shillong, u Myntri Rangbah u la pynbna ruh ban ai jingkyrshan ïa ka Hospital kaba don ha Jaïaw Shillong na ka bynta ban ai jingshakri ïa ki nongpang ha ka Laser Lithotripsy.
