Delhi, K’lyngkot, 18: Ka Aam Aadmi Party (AAP) ha ka sngi Saitjaiñ ka la pyllait ïa kawei ka video kaba la ïohring dur ïa ka kynhun jong ki briew kiba rah ïa ki lama iong bad kawang maw ïa ka kali kaba shong da u Arvind Kejriwal katba dang ïaid lynti ha New Delhi.
Da kaba kdew katkum kane ka video, ka AAP ka la kam ba ïa ka kali la kawang maw da ki dkhot ka BJP.
Haba pynpaw pyrthei sa kawei ka video kaba la jia ha kane ka jingjia, u nongïakhun pyrshah na New Delhi Seat u Parvesh Sahib Singh uba long ruh u nongïalam ka BJP u la kynnoh ba ki briew ki la pyrshang ban kylli jingkylli ïa u Kejriwal bad arngut ki samla ki la shah syllad ha ka kali jong u Kejriwal bad mynta ki don hapdeng ka jingshah sumar ha hospital sorkar.
U Kejriwal uba long u nongïalam ba hakhlieh duh jong ka AAP u don ha ka Z-plus Category Security.
“Ki nongkyrshan jong u kyrtong ka BJP na New Delhi u Parvesh Verma ki dei kiba la thomor ïa u Kejriwal katba u dang leit ïalap elekshon hapoh ka constituency” la ong u nongïalam ka AAP.
Ki Pulit ki la ong ba ym shym la don mano mano ruh ba kawang maw ïa ka kali u Kejriwal hynrei ki don tang katto katne ngut ki briew kiba pyrshang ban pyni da ki lama iong hakhmat u Myntri Rangbah barim ka Delhi, ha kaba mar mar la pynkynriah noh ïa u na kane ka jaka.
Ha ka Video ba la ring na kane ka jingjia, la ïohi ba u Kejriwal u don hapoh ka kali ryngkat katba ki Pulit ki dang ïaleh ban pyllait ïa ka surok. Uwei u briew u la rah da ka jaiñ iong bad uwei u maw uba la sied sha ka kali lah ban ïohi kyndiang ha ka video.
