Shillong, K’lyngkot, 19: Ki Pulit Traffic ka Sohra Civil Sub-division ha ka sngi u Blei ki la talasi naphang ïa ki kot ki sla jong ki nongñiah thuk thuk ar shaka ha ka shnong Mawkdok kaba don ha shilynter jong ka surok Shillong-Sohra.
Ha u kyrwoh ba la phah da u Superintendent of Police ka East Khasi Hills Bah Vivek Syiem u la pyntip ba kane ka jingtalasi ïa ki kot ki sla jong ki nongñiah thuk thuk ar shaka ka long ban tehlakam ïa ki nongñiah thuk thuk ar shaka kiba ju pynlong ïa ka surok Shillong Sohra kum ka surok pynmareh kali khamtam ha ka shnong Mawkdok kaba ju pynthud haduh katta katta ïa ka leit ka wan jong ki nongjngohkai pyrthei bad ki paidbah nongleit jingleit bad kiba ju long ki daw kiba lah ban ngat ha ki jingjia aksiden kiba lam sha ka jingïap briew.
Ha ka sngi Saitjaiñ ruh ki Pulit Traffic bad SOT ki la talasi naphang ïa ki kot ki sla kali jong ki nongñiah thuk thuk ar shaka ha kylleng ka nongbah Shillong.
U SP u la pyntip ba kane ka jingtalasi ka long ban pynthikna ïa ka shongsuk shongsaiñ hapoh ka nongbah Shillong bad ban pynthikna ruh ba ki nongñiah ar shaka ki ym pynkheiñ ïa ki aiñ ñiah kali khamtam ha ka por mynmiet mynïong.
Ki Pulit kin dang ïai bteng ïa kane ka jingtalasi nangne shakhmat.
