Shillong, K’lyngkot, 20: Ka United Democratic Party (UDP) ha ka Lah Sngi u Blei ka la pynbna ïa ka kyrteng jong ki kyrtong ki ban aireng ha ka elekshon MDC sha ka KHADC bad JHADC ka ban sa long ha ka 21 tarik, Rymphang, 2025.
Ïa ki kyrteng la pynbna da u General Secretary ka UDP u Dr. Jemino Mawthoh bad la pynskhem pat da u President Bah Metbah Lyngdoh.
Kine ki kyrtong ki kynthup ïa u Bah Lee Trevor S Bareh, u Bah Synshar Kupar Roy Lyngdoh Thabah na Sohiong Constituency, u Bah Anthony Khongwang na Nongshken Constituency bad u bah Meiowan Pasi na Nangbah Mihmyntdu.
Haba kren sha ki la pathai khubor, u Bah Metbah Lyngdoh u la ong ba kane ka dei ka thup kyrteng kaba lai ba la pyllait da ka UDP.
U la pynpaw ruh ba ka UDP ka don ïa ka jingkyrmen bad ka jingshaniah ha ki paidbah ban pynjop ïa ki kyrtong kiba ka party ka la pynieng.
Shuh shuh u la ong ba ka UDP ka la pynieng ïa ki kyrtong kiba kynsai bad u la ong ruh ba khlem pep ka UDP kan ioh ïa ka jingjop ha KHADC bad ha JHADC.
U la ïathuh ruh ba ka jingjied ïa ki kyrtong ka long kaba khuid ba suba da kaba pynshong nongrim ïa ka jinglong jong ki kyrtong bad ka jingioh jingkyrshan na ki nongtrei ka party ha ki Block bad ki Circle.
Ha kajuh ka por u lakular ba ka party kan kyrshan radbah ïa ki kyrtong ha kane ka elekshon.
