Shillong, K’lyngkot, 21: Ka Khasi Students’ Union (KSU) ha ka Sngi Baar ka la sam ïa ki kot lyngkdop ba kyntu ïa ki paidbah ban kyntait mardor ïa ka sienjam jong ka Sorkar Jylla ban pyntreikam ïa ka Meghalaya State Investment Promotion & Facilitation Act, 2024 (MSIPF), kaba plie lad ban pynkha ïa ki Land Bank na ka bynta ban kyntiew ïa ka jingbei tyngka ha kane ka jylla.
Ïa ki kot lyngkdop la sam da ki dkhot ka KSU sha ki jaka ïew, ha ki surok, kynthup ïa ki khynnah skul, ki nongshong dukan, ki nongniah kali bad kiwei kiwei ha nongbah Shillong.
Kane ka la jia shisngi hadien ba ka KSU ka la aiti ïa ka dorkhas sha u Myntri Rangbah ka Jylla ban pynpaw ïa ka jingpyrshah kaba jur halor ka jingpynkha ïa ki Land Bank.
