Shillong, K’lyngkot, 29: Ka Khun Hynniewtrep National Awakening Movement (KHNAM) ka la kynthoh tyngeh ïa ki Executive Committees barim ba la ïalam da ki seng saiñpyrthei bapher bapher ha Khasi Hills Autonomous District Council (KHADC) da kaba kynnoh ba ki la pyndonkam ïa ka ‘Trading by Non-Tribal Regulation, 1954’ kum ka ‘“Counter ban lum khajna’ ha jaka ban ïada ïa ka khaii ka pateng jong ki trai ri trai muluk.
Ïa kane la pynpaw da u Working President ka KHNAM u Bah Thomas Passah ha ka sngi Balang haba synran lang ïa ki lai ngut ki kyrtong ka party ba kynthup ïa u Bah Pynshai Mawrie na Mawkynrew, u Bah Ericton Swer na Nongthymmai bad u Bah Raymond Basaïawmoit na Mawkhar-Pynthorumkhrah kiba leit thep kyrteng na ka bynta ka elekshon MDC ka ban sa long.
Ha ka jingïakren bad ki lad pathai khubor, u Bah Passah u la ong, “ka jingthmu jong ka ‘Trading by Non-Tribal Regulation, 1954’ ka long ban ïada ïa ka khaii ka pateng jong ki trai ri trai muluk hynrei kaba sngewsih ka long ha kine ki 73 snem ba la leit noh, ki seng saiñpyrthei kiba ïohbat ha ka bor synshar ha KHADC kim shym la pyntreikam ïa ka kum ka lad jingïada hynrei ki la pyntreikam ïa ka kum ka “Counter” lum khajna (da kaba ai Trading License pathar ïa ki briew kiba wan nabar ka jylla.”
“Namarkata, lada ngi shah jied sha District Council, ngin pynthikna ïa ki paidbah ba ngin wanrah ïa ki jingkylla ban pynlong ïa ka ‘Trading by Non-Tribal Regulation, 1954’ kaba khlaiñ ban ïada ïa ka pliangja jong ki trai jylla da kaba pynduna ne da kaba pyrkhing ban ai ïa ka Trading License sha kiwei pat ki jaidbynriew ki bym dei ki Khasi,” la pynpaw u Bah Passah.
U Bah Passah u la ong ruh ba ka ‘Trading by Non-Tribal Regulation, 1954’ ka don tang ha ki District Council namarba ka Sorkar Jylla haduh mynta kam don satia ïa ka aiñ kaba ïada ïa ka khaii ka pateng jong ki trai shnong riewlum ka jylla.
“Hynrei, ka ‘Trading by Non-Tribal Regulation, 1954’ ka dang tlot kumba ka long mynta. Namarkata, ngi don jingmut ban wanrah ïa ka jingkylla da kaba kham pynkhlaiñ shuh shuh ïa ki bniat khnang ba kan long kaba khlaiñ ban ïada ïa ka hok bad ka jingmyntoi jong ki briew jong ngi ha kaba ïadei bad ka jingkiew ka kamai kajih,” u la bynrap.
Haba kylli, u Working President ka KHNAM ula ong ba ka party jong u kan pynthikna ba kan pynthymmai ruh wat ïa ki jingtreikam jong ka KHADC.
“73 snem ki la ïaid bad bun ki jingdkoh kiba ngi la sakhi ha ka jingtreikam jong ka District Council. Ka KHADC ka la phiel nadong shadong ha baroh ki kam kumba la pynkupbor da ka Sixth Schedule jong ka riti synshar ka ri India. ka Sixth Schedule ka dei ka kynroh ïada jong ngi riewlum ritpaid. Lada kane ka kynroh jingïada ka khyllem, khlempep ki jingma kiba bun ki la ap lypa ïa ngi kum ka jaidbynriew ritpaid,” u la maham.
“Namarkata, ka thong ba hakhmat eh kaba ngi ïakhun ïa kane ka elekshon ka long ban pynthikna ba dei ban pynthymmai lut nadong shadong ïa ka jingtreikam jong ka KHADC. Ngi kwah ïa ka KHADC ba thymmai kaba lah ban ïada ïa ka khyndew ka shyiap bad kaba pynkupbor ïa ki bor synshar trai ri,” la kular u Bah Passah da kaba kham ruh lada ka KHNAM ka ïohbat ïa ka bor synshar ha KHADC, ka don ka jingkyrmen ïa ka jaidbynriew.
Katkum ka jingong jong u, ka party ka la pynshong nongrim ban jied ïa ki kyrtong halor ka jingtbit ym ha ka jingbun khnang ban pynthikna ba kum ka kynhun kan poi sha ka thong ban ai jingïada ïa ki paidbah.
Hadien baladep ban thep kyrteng, u Bah Mawrie u la ong ba un trei na ka bynta ban pynurlong ïa ki mat treikam jong ka party.
U Bah Swer ha kawei pat ka liang u la ong, “ngi ieng skhem halor ka nongrim ba ngin ïada ïa ka jaidbynriew. Ka party kan sa pynmih ruh ïa ka mat treikam (manifesto) ha ki khyndiat sngi ki ban sa wan.”
U Bah Basaïawmoit u la ong ba ka thong jong u haba ïakhun ïa kane ka elekshon ka long ban pynkhlaiñ shuh shuh ïa ka Sixth Schedule ha KHADC. Da kaba pynpaw ba u don ka jingkyrmen ban jop ïa ka elekshon na Mawkhar-Pynthorumkhrah
u la ong, “nga la trei shitom bha bad ka shong mynta sa ha ki paidbah ban ai ïa ka rai.”
