Shillong, Rymphang, 03: Shuwa ba u Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem un leit ban thep kyrteng kum u kyrtong jong ka National Peoples Party (NPP) na Nongthymmai Constituency ki MDC na ki Autonomous District Council bapher bapher jong ka thain shatei Lammihngi ki la leit ban ai ka jingkitbok kitrwiang ia u Bah Pynïaid ba un ïoh ïa ka jingjop ha kane ka elekshon ban sa long sha ka Khasi Hills Autonomous District Council (KHADC) ha ka 21 tarik mynta u bnai.
Kine ki MDC kiba la leit kitbok kitrwiang ïa u Bah Pynïaid ha iing sah jong u ha Pohkseh, Shillong ki kynthup ïa ki MDC na ki District Council jong ka Tripura, Mizoram, Karbi Anglong, Bodo Territoiral Council bad kumjuh ruh ki MDC jong ka Garo Hills Autonomous District Council. Don napdeng jong ki, ki dei ki Chairman bad don ruh kiba dei ki Executive Member jong ki Autonomous District Council.
Shuwa ba u Bah Pynïaid un mih na la iing ban leit thep kyrteng la pynlong ïa ka jingïalang ba lyngkot ha iing sah jong u kum ka jingkyrkhu kyrdoh ha kaba la don lang ki bahaiing hasem, ki nongïalam jong ka NPP bad ki nongkyrshan jong u.
Haba kren sha ki lad pathai khubor hadien ba u la pyndep ïa ka jingthep kyrteng jong u, Bah Pynïaid u la ong, lada kane ka jingpynbeit thymmai ïa ka Khyrnit Bahynriew ha Parliament kan urlong kumba ladep ban tyrwa, yn ym don Municipal Area shuh ha ri Khasi bad baroh kin hap noh hapoh ka Schedule Area bad kin hap hapoh ka jingpeit jong ki Autonomous District Council (ADC).
U Bah Pynïaid u la kob ba mynta ka kynti ruh ka NPP kan sa ïalam biang ïa ka Executive Committee (EC) ha Khasi Hills Autonomous District Council (KHADC) kumta u la kyntu ïa ki seng saiñpyrthei kiba ïakhun ïa kane elekshon ba kim dei ban kynthoh than namarba ha kaba kut kin hap ban ïatreilang bad ka NPP.
