Shillong, Rymphang, 05: Ka Meghalaya State Pollution Control Board ka la leh da kaba tyngeh da kaba pynmih ïa ka hukum ban khang khyrdep ïa ki 6 tylli ki karkhana kiba don ha ka shnong Byrnihat na ka jingpynmih ïa ka tdem jaboh kaba ktah ïa ka koit ka khiah jong ki paidbah bad kiba pynkhein ruh ïa ki aiñ ïada mariang.
Ka Meghalaya State Pullution Control Board (MSPCB) ka la daiñ kuna ruh ïa ka Shyam Century Ferro Alloy Pvt. Ltd. 4 lak tyngka, katba kaKhasi Alloy Ltd. ka la shah daiñ kuna 2 lak tyngka namarka jingpynmih ïa ka tdem jaboh.
U Environmental Engineer jong ka Meghalaya State Pullution Control Board u YBah .F. Laloo u la pyntip ba kine ki karkhana kiba la shah khang khyrdep ki long ka Shyam Century Ferro Alloy Pvt. Ltd., ka Khasi Alloy Private Ltd., ka Nalari Ferro Alloys Pvt. Ltd., ka Pawan Casting Pvt. Ltd., ka FW Ferro Tech Pvt. Ltd., bad ka SR Bio-Product Pvt. Ltd.
Ki ophisar jong ka Meghalaya State Pullution Control Board ki la pynlong ruh ïa ka jingleit jurip kyndit ha ka por mynmiet ïa ki karkhana kiba don ha 13 Mer, Tamulkuchi, ban lap la ki don neem ki karkhana kiba pynkhein ïa ki kyndon aiñ ïada mariang ha ka por mynsngi bad ha ka por mynmiet.
Shuh shuh u Bah Laloo u la ong ba ka jingjurip kyndit kan dang ïai bteng ha Ri Bhoi District, West Khasi Hills District bad ha ki bynta bapher bapher ka jylla khnang ban lap ïa ki karkhana kiba pynkhein ïa ki aiñ ïada mariang.
