Shillong, Rymphang, 07: Ka Drug Reduction Elimination & Action Mission (DREAM) kaba dei ka mishon ba la buh thong da ka Sorkar Meghalaya ban rat dyngkhong ïa ka jingwanrung jong u drok bad ban tehlakam ïa ka jingjyllei jong ki briew kiba la pyndonkam ïa u drok, ha ka sngi Thohdieng ka la pynlong ïa ka jingai jinghikai ne ka Vocal Additional Training (VAT) ba la ïashim bynta da ki nongmihkhmat na ki shlem ai jinghikai bapher bapher kiba don ha nongbah Shillong, kum ka ITI, ka Don Bosco Youth Centre (DBYC), ka Don Bosco Technical School (DBTS), ka Meghalaya State Skill Development Society (MSSDS) bad kiwei kiwei.
Kane ka jingai jinghikai ba kyrpang ka long ïa ki samla kiba la im kyrni mynshwa ha ka jingdih drok kiba dang don mynta hapdeng ka jingshah sumar ha New Hope De-addiction Cum Counselling Centre ba la pynïaid da ka KJP Assembly jong ka Balang Presbyterian kaba don ha ka Mawdiangdiang, New Shillong.
U Mission Director jong ka DREAM u Bah Francis Kharshiing ha ka jingïakren bad ki lad pathai khubor u la ong ba ka jingpynsdang ïa ka Vocal Additional Training (VAT) ka long ban ai jinghikai ïa ki samla kiba dang shah sumar ha kane ka Centre khnang ba ynda ki la ïoh jingkoit kin dup lah ban trei ïa ki kam ba ki la ïoh jinghikai da kaba ieng ha la ki jong ki kjat bad ba kin ym leit phai shuh sha ka jingim kaba rim.
Ha ka jingïakren bad uwei na ki samla uba la koit na ka jingpang u la pynpaw ïa ka jingsngewkmen haba u ïoh kum ïa kine ki jinghikai bad ong ruh ba kan long ka jingmyntoi ïa kito ki samla kiba dang don hapdeng ka jingshah sumar.
