Shillong, Rymphang, 08: Kan long ka khubor kaba pynkmen haduh katta katta ïa ki riewngeit jong ka Balang Catholic ha kane ka Jylla Meghalaya khamtam ïa ki paid u Blei ha ka Bri u Hynniewtrep Hynniewwasa hadien ba u Pope Francis u la thung ïa u Rev. Fr. Bernard Laloo uba long u Chancellor bad u Parish Priest jong ka Cathedral Parish kum u Auxiliary Bishop jong ka Jyllaniambah Shillong.
Ïa kane, la pynbna sha ki paidriewngeit ka Balang Catholic da u Archbishop ka Jyllaniambah Shillong u Most Rev. Victor Lyngdoh ha ka 8 tarik, Rymphang, 2025 hadien ba u Apostolic Nuncio jong ka Vatican sha ri India u Most Rev. Leopoldo Girelli u la pyntip ïa kane ka khubor kaba kmen sha u Archbishop Victor Lyngdoh.
U Archbishop Victor Lyngdoh haba ïakren bad ki lad pathai khubor u la ïathuh ba ïa kane ka jingpynbna paidbah jong u Pope Francis la pynbna ha Rome ha ka 8 tarik, Rymphang, 2025 ha ka por mynsngi kaba ïahap bad ka por jong ka ri India, kata, ha ka por 4:30 baje janmiet.
Shwa kane, la pynlong shwa ïa ka jingmane ïa ka Sacrament Bakhuid Tam ka Duwan ha Iingmanebah ha Laitumkhrah Parish ba la ïalam da u Rev. Fr. Gerald Khongji ha kaba la sakhi lang da u Bishop ka Jyllaniam Jowai u Most Rev. Ferdinand Dkhar, u Bishop ka Jyllaniam Nongstoin u Most Rev. Wilbert Marwein, u Vicar General ka Jyllaniambah Shillong u Rev. Fr.Richard M. Majaw, kiwei pat ki Lyngdoh Sohblei, ki Sister bad ki paidriewngeit.
Kum ban shu pyntip hangne ba ïa u Rev. Fr. Bernard Laloo la kha ha ka 16 tarik, Jylliew, 1976 ha ka shnong Laitlyngkot, bad u la shah pynkyntang kum u Lyngdoh Sohblei ha ka 30 tarik, Ïaiong, 2006.
U la shakri kum u Assistant Parish Priest jong ka St. Paul’s Church, Upper Shillong (2006-2007), kum u Administrator jong ka Christ the King College, Shillong (2008), kum u Dean of Studies ha St. Paul’s Seminary, Shillong (2009-2015), kum u Principal jong ka Divine Saviour Higher Secondary School, Laitumkhrah (2015-2016), kum u Director jong ka Social Service Center, Shillong (2017-2021), kum u Board Member jong ka Caritas India (2021-2024). Naduh u 2022 haduh mynta u la shakri kum u Chancellor jong ka Archdiocese of Shillong bad kum u Parish Priest jong ka Cathedral of Mary Help of Christians, Laitumkhrah.
U la long ruh u dkhot barim jong ka Farmers’ Commission bad ka State Tuberculosis Co-morbidity Coordination Committee, ka Sorkar Meghalaya.
U la pyndep ïa ka jingpule Bachelor’s Degree ha ka sobjek Education bad ïa ka Masters of Arts ha ka sobjek Sociology nalor ba u la ïoh ruh ïa ka Post Graduate Diploma ha ka Counselling Psychology.
 | ReplyForwardAdd reaction |
