Shillong, Rymphang, 10: Ka kudam buh tiar Electronic bad Computer jong ka Lifeline kaba don ha Umsohsun, Shillong kaba phai khmat sha GS Road, ka la kem ding kynsan ha ka Lah Sngi u Blei ha ka por por kumba 11.30 baje mynstep.
Da ka jingwan poi biang por jong ki kali pynlip ding ka tnat Fire and Emergency Service la lah ban tem ïa ka jingklang ki thylliej ding hapoh kane ka kudam.
Katkum ka jingtip ba la ïohlum, la ïathuh ba kane kudam ba la long trai da ka Kong Joan Manners ka dei kaba la shim wai da u Anuj Bawri.
Haba kylli na u Anuj Bawri, u la pyntip ba ka jingjulor ha kane ka jingjia ka la kot haduh kumba T. 70 lak namarba ki tiar computer bad electronics ki long ki mar kiba kham rem dor.
Ki Pulit kiba la ïoh jingtip halor kane ka jingjia ki la wan poi ban pynlong ïa ka jingtohkit khnang ban tip na kaei ka daw kaba la lam sha ka jingkem ding jong kane ka kudam buh tiar.
