Shillong, Rymphang, 10: Ka Khun Hynñiewtrep National Awakening Movement (KHNAM) ha ka Lah Sngi u Blei ka la pyllait paidbah ïa ki mat treikam ne ka Manifesto jong ka party na ka bynta ka elekshon sha ka Khasi Hills Autonomous District Council (KHADC) ka ban sa long ha ka 21tarik, Rymphang, 2025.
Ha ka jingpyllait paidbah ïa ka Manifesto da u General Secretary ka Party u Bah James A. Neng la sakhi lang da ki 11 ngut ki kyrtong bad ki dkhot jong ka party ha ka jingïalang kaba lyngkot kaba la long hakhmat ki durmot jong ki khlawait ka jylla ha phyllaw ka State Central Library.
Ki 14 tylli ki mat jingkular ba ka KHNAM na ka bynta ka elekshon MDC 2025 ki long ban wanrah ka jingtreikam kaba khuid ba suba ha ka Council.
Ka party kan shim ïa ki sienjam ban pynjanai bad pynbha shuh shuh ïa ka Khyrnit Bahynriew jong ka riti synshar ka ri India. Ban dawa ba dei ban pynduh noh ïa ka Para 12 (AA) na ka Khyrnit Bahynriew jong ka riti synshar ka Ri India.
Ban pynthikna ba dei ban pynneh pynsah bad ban pynkhlain ïa ka bor laitluid jong ka Council. Ban lum jingtip halor ki jaka ki puta kiba don hapoh u pud u sam jong ka Council. Ban pynlong aiñ (codify) ïa ki riti ki dustur ha ki It ki hima bad ki Ilaka.
Ban pynkhlaiñ ïa ka pla pisa jong ka Council. Ban pynthikna ban ïoh ïa ka jingtip kaba bniah halor ka jingïohlum khajna na ka Sorkar Jylla, khnang ba ka Council ruh kan tip ïa la ka bhah.
Ban pynduh noh ïa ka jinglum pisa be-aiñ lyngba ki Hima bad ka Council. Ban pyntreikam hok ïa ka Trading by Non-Tribal Regulation 1954 bad ban ïada ïa ka khaii ka pateng ki trai ri trai muluk. Ban pynkylla ïa ki katto katne ki bynta jong ka Regulation katkum ka jingïaid jong ka por bad ban pynduh noh ïa ki License jong ki kam kiba u Khasi u la lah ban trei.
Ban pyndonkam ïa ka Trading by Non-Tribal Regulation 1954 ban ai mynsiem ïa ki khun samla ban seng kam bad ban ïohkam ha la ka jong ka jylla.
Ka aiñ kam shah ïa ki bym dei ki Khasi ban long Rangbah Shnong hynrei la lap ba don ki shnong kiba ki jaidbynriew ki bym dei ki Khasi ki long Rangbah Shnong kaba wanrah ïa ka jingma halor ka hok longtrai halor ka khyndew ka shyiap. Namarkata, ka party kan pynbeit ïa ka rukom treikam jong ki It ki Hima, ki Ilaka katkum ka jingaibor jong ka Aiñ.
Ka party kan pynïoh pat ïa ka bor ban ai (issue) syrnot Riewlum (Schedule Tribe Certificate) da ka Council bad ban dawa ruh ban pynbeit thymmai ïa ka Schedule Tribe Order 1950.
Ka Party kan pynthikna ba nangne shakhmat kan don noh da ka rukom thungkam kaba khiud ba suba ha ka lynti kaba dei.
Ka Sorkar Jylla lyngba ka Notification 1982 ka la pynlong ïa ki paidbah ban rejistar ïa ka khyndew jong ki bad ka Sorkar Jylla. Ka Khyndew ka hap hapoh ka Para 3 jong ka Sixth Scheduled, namarkata, ka party kan ïasaid ban pyndam noh ïa kane ka Notification 1982 bad ban rejistar noh ïa ka khyndew bad ka Council.
