Shillong, Rymphang, 10: Uwei u briew ïa uba la tip kyrteng kum u Pynshailang Puweiñ uba la shah thwet ha ki Pulit ka Lumdiengjri Police Station halor kawei ka case kam shukor u la shah bat bad ki saw ngut ki paralok ha ki Pulit jong ka Specïal Operation Team (SOT), East Khasi District hynnin ka sngi u Blei.
U kyrwoh ba la phah da u Superintendent of Police ka East Khasi Hills u Bah Vivek Syiem u la pyntip ba u Pynshailang u la shong ha ki ar tylli ki kali, kata, kawei da ka Celerio bad kawei ka Swift.
U SP u la pyntip ba ki Pulit ki la ïoh kurup kawei ka Country Made .22 pistol bad saw tylli ki kuli, ar tylli ki kali, hynriew tylli ki mobile phone bad katto katne ki kot ki sla thok.
Nalor u Pynshailang Puweiñ, 30 snem ka rta na ka shnong Riangmaw, Shallang, West Khasi Hills uba la shah kem, ki Pulit ki la kem ruh ïa ki saw ngut kiwei pat kiba la tip kyrteng kum u Aidonsing Nongsiej, 40 snem ka rta na New Nongstoiñ, West khasi Hills, u Orally Khardewsaw, 33 snem ka rta na Nongkhlaw, Nongstoiñ, West Khasi Hills, u Wanrilang Nongkynrih, 33 snem ka rta na Mawlai Mawtawar, Shillong, u Mossingstar Nongbri, 28 snem ka rta na ka shnong Massar, Eastern West Khasi Hills.
Ki Pulit ki la register case ha Mawsynram Police Station hapoh ka Section 336(3)/3(5) jong ka BNS bad pule lang bad ka Section 25(1A)(1B) jong ka Arms Act.
Ki Pulit ki dang pynlong shuh shuh ia ka jingtohkit ban lap shuh shuh ia ka jingdonkti jong ki ha ki kam runar.
