Shillong, Rymphang, 11: U Jonga Bahadur Sunar, u nongai dud uba la 69 snem ka rta na ka shnong Shangbangla, Ri-Bhoi District uba la mynsaw jur hadien ba u la shah syllad ha kawei ka kali Mahindra Thar kaba synran ïa u Director General jong ka tnat shipai Assam Rifles katba ka dang mih na Shillong ban leit sha Guwahati airport u la khladnoh ha ka janmiet sngi Baar.
Kane ka la jia ha ka sngi Baar ha ka por kumba 10:20 baje mynstep hajan ka ophis u Deputy Commissioner jong ka Ri-Bhoi District.
Tang ha ka por janmiet la ioh jingtip ba une u nongai dud u la khladnoh na kane ka sla pyrthei namarba la jur shaba palat ka jingmynsaw.
Katkum ka khubor ba la ïohlum na ki Pulit la ïathuh ba une u nongai dud u la ngat ha ka jingjia aksident katba u dang thmu ban jam sha shiliang surok bad ha kum kane ka por kawei ka kali Thar kaba la pynher stet bha kaba don ïa u nombar ML 05-Y 3232 ka la tynrah beit beit ïa u bad ïa ka saikil kaba u ñiah.
La ïathuh ruh hadien ba ka kali Mahindra Thar ka la syllad ïa u nongai dud ka la leit tynrah ruh sa ïa u divider jong ka surok Four Lane kat haduh ba ka taïar kali na ka bynta kaba shakhmat jong kane ka kali Mahindra Thar ka la bthei.
Ïa u nongai dud uba la mynsaw jur la pynkit noh marmar sha Nongpoh Civil Hospital ban ïoh ïa ka jingsumar hynrei namar ka jingjur shaba palat ka jingmynsaw la pynkynriah noh ïa u sha nongbah Shillong ban ïoh ïa ka jingsumar kaba kham bha.
