Shillong, Rymphang, 14: Ki paid nongshong shnong jong ka shnong Mawngap Khlieh Shnong ki la khie bitar lep ïa u Lyngdoh ka Hima Mawphlang ha kaba la kynnoh ba u donkti ban leh donbor hapoh ka shnong bad ban tuklar ruh wat ïa ka synshar ka khadar hapoh kane ka shnong.
Da ki spah ngut ki paidbah naduh ki longkpa, ki longkmie bad ki samla ki la shong ïa ka jingïalang bakyrkieh ha ka sngi Thohdieng ban ïakren halor ka jingbym ailad jong u Lyngdoh ka Hima Mawphlang ïa u Bah Khambor Kharshandi ba un thep kyrteng kum u kyrtong ban ïakhun ïa ka kam Rangbah Shnong ka ban long ha ka 18 tarik mynta u bnai.
U Bah Khambor Kharshandi u dei uba la bat teng kum u Rangbah Shnong jong ka Mawngap Khlieh Shnong naduh u snem 2021 hynrei u Lyngdoh ka Hima Mawphlang u la weng jubor ïa u ha u Nailar 2022.
Kane ka jingshah weng jubor jong u Bah Kharshandi ka dei na ka kam pisa tyngka ha kaba la kynnoh ba u Lyngdoh u la pan ïa ka pisa ba ka shnong ka ïoh kum ka jingsiew ïa ka bailutksan na ka Power Grid hynrei ka Dorbar Shnong hapoh ka jingïalam jong u Bah Kharshandi kam shym kohnguh satia ban ai ha u Lyngdoh namarba ka dei ka hok jong ka shnong ym jong ka Hima.
U Bah Kharshandi haba kren ha ka jingïalang u la ong, “kum u Rangbah Shnong ngam don bynta na nga shimet ban ïakhun mukotduma ïa ka ophis jong ka Hima Mawphlang, hynrei kine ki kam baroh ki mih hadien ba u Lyngdoh u la weng ïa nga na ka kam rangbah shnong bad kam ruh ïa ki jaka bad ki jingdonkam baroh kiba ïadei bad ka jingmih na ka jaka. Khnang ban ïoh kam trai lut baroh kiba dei jong ka shnong u la ujor da ka mukotduma pyrshah ïa nga bad ïa ka shnong baroh kawei. Ym dei ma nga uba ujor mukotduma hynrei ma u (Lyngdoh Hima Mawphlang) hi uba ujor mukotduma pyrshah ïa nga bad ïa ka Executive Committee jong ka Dorbar Shnong.”
Namar ka jingshah pynduh jong u kyrtong uba ki la jied ban ïakhun ïa ka elekshon Rangbah Shnong, ki paidbah ki la rai ba kin ym ailad da leilei ruh em ba ka Hima kan pynlong ïa ka elekshon ha ka 18 tarik mynta u bnai.
Ki la byrngem ruh, lada u Lyngdoh ka Hima Mawphlang u thmu ban leh da ka bor, ma ki ruh kin mih paidbah ban ïa pyni bor markylliang.
“Hadien ba ki paidbah ki la phah thep kyrteng ïa nga ha ka ophis jong ka Hima Mawphlang, ki la don kita ki Returning Officer ba la thung da u Lyngdoh ka Hima Mawphlang hynrei ki la phah pule shwa ïa ka kot ba la thoh ïa ki kyndon. Ngi sngewthuh ba ki kyndon ki dei ki jingpyrshang ban leh donbor ïa ka synshar ka khadar,” la ong u Bah Kharshandi.
