Shillong, Rymphang 16: U MDC ka BJP na Tura u Bernard N. Marak u la pynpaw ïa ka jingsngewkhia ha kaba ïadei bad ka jingpynslem ban pyntreikam ïa ka Agreed Text for Settlement (ATS) da ka Sorkar Jylla ha ka jingïakynduh ïa u Myntri ka tnat Iada Ri ka Sorkar Pdeng u Rajnath Singh ha Delhi.
Dei ha ka por ba u Rajnath Singh u dang bat ia ka tnat Kam Pohiing ka Sorkar India ka seng kieng atiar ANVC ka la ïasoi ïa ka jingïamynjur hapdeng ka Sorkar Pdeng, ka Sokar Jylla bad ka ANVC.
U Marak u la pynrem jur ruh ïa ka Congress bad ki nongïalam jong ka National Peoples Party (NPP) ba ki la pynsniew dur ïa ka jingïamynjur kaba la ïasoi bad ka Sorkar BJP da kaba kynnoh ruh ba ka Sorkar Jylla ka la ïoh bun ki jingmyntoi na ka Sorkar Pdeng ha kaba ïadei bad kane ka kam.
Halor kane u Marak u la ong ba hadien ba ka BJP ka la ïoh ban synshar kane ka jingïamynjur la ïasoi hapoh ki 6 bnai hadien ba ka sorkar ba la ïalam da ka Congress ka la pynslem ïa kane ka jingmynjur kaba la long palat ïa ka 10 snem.
U la ong ba ka sorkar Congress ha ka jylla ka la pynslem ban pyntreikam ïa kane ka jingïamynjur wat hadien ba la dep ban ïasoi suskular, bad kumjuh ruh ka sorkar NPP ka la pynslem ban pyntreikam ïa kane ka jingïamynjur da kaba bud ïa ki sienjam ba la ïalam da ka seng Congress. U la ong ba ki don ki party kiba long pyrshah riewlum bad kiba long pyrshah ïa kane ka jingïasoi soskular hapdeng ki riewlum kaba thmu ban pynkhlaiñ ïa ki Autonomous District Councils (ADCs) lyngba ka jingpynkylla ïa ka Sixth Schedule.
U Marak u la kam ruh ba ka BJP ka kwah ban pynkupbor ïa ki nongïalam shnong, ki kam synshar shnong, ki Rural bad Urban Local Body ba kin ïoh ki jingïarap pisa kiba wan beit napoh ka sorkar pdeng. “Hynrei ka Congress bad ki nongïalam ka NPP ki la pynsniewdur ïa kane ka jingïamynjur kaba la soi bad ka sorkar BJP katba ka sorkar jylla lyngba kane ka la ïoh ki jingmyntoi na ka sorkar pdeng,” u la ong.
“Ka jingïamynjur kaba la soi ha u snem 2014 bad 2025, ka khlem da wanrah shisha ïa ki jingkylla ïa ki ADC. Mynta la kumba 10 snem, ki Autonomous District Council ki khlem pat ïoh satia ïa ki 13 tylli ki tnat, ki khlem ïoh ki jingkyrshan pisa bad kiwei kiwei ha kine ki 5 snem ba la leit. Ka jylla ka la shim kabu ïa ka Agreed Text for Settlement da kaba shim kabu ïa baroh ka pisa sha ki tnat ka sorkar jylla. Ki Autonomous District Council ki la sdang ban ïoh ki special package hadien ka jingïasoi ka jingmynjur hynrei ka party kaba synshar ka la pyndonkam bakla ïa kane ka fund lyngba ki contractor da kaba ieh ïa ki ADC ha Meghalaya ba kin ym lah ban aiti ïa ki Utilisation Certificate naba bun na ki project ki la long duplicate,” u la ong.
“Ka jingpynkylla thymmai kaba 125th ïa ka Sixth Schedule mynta ka la ïaid kaba la pynslem na ka daw jong ka jingbym shimkhia jong ka sorkar jylla. Ka BJP ka la shimkhia ban kyntiew ïa ki ADC lyngba ka Agreed Text for Settlement bad ban pynkhlaiñ ïa ki kam synshar shnong bad kaba pynshlur ïa ki Local Self Governance,” u la bynrap.
