Shillong, Rymphang, 17: Ka ïew Nongstoiñ ha ka Lah Sngi u Blei ka la shlei smam da ki paidbah nongkyrshan kiba rah ruh da ki lama jong ki Seng saiñpyrthei bapher bapher ban pyni ïa ka jingbun paid jong ki ha ka rynsan ïalap election jong baroh ki kyrtong ïakhun elekshon MDC ha Nongstoiñ Constituency ïa kaba la pynïaid da ka Dorbar Shnong New Nongstoiñ.
Ha kane ka rynsan ïalap election na kajuh ka rynsan la sakhi ruh ba baroh 6 ngut ki kyrtong ïakhun elekshon MDC na Nongstoiñ Consituency ki la ïashim bynta ban ai jingkren ryngkat ka jingdonlang jong ki nongkyrshan ban pynksan ruh ïa la ki jong ki nia ki jutang bad ïa la ki jong ki Seng saiñpyrthei ba ki la ïeng ban ïakhun ïa ka election MDC na Nongstoiñ Constituency.
La sakhi ruh, nalor ki nongkyrshan jong ki kyrtong bad ki Seng saiñpyrthei bapher bapher, ki paidbah nongleit thied leit pet ruh ki la tuid sha kane ka rynsan ïalap election kaba la long ha Market Complex ban sngap ïa ki jingpynshai na kine ki kyrtong.
