Shillong, Rymphang 22: Ki Pulit jong ka PanBazar bad Special Task Force (STF) jong ka jylla Assam ha ka miet sngi Thohdieng ki la kem ïa u Chancellor jong ka skul bah University of Science and Technology Meghalaya (USTM) u Mahbubul Hoque naka iing sah jong u kaba don ha Guwahati.
Ïa ka daw tynrai halor jingshah kem jong Hoque ym pat lah ban tip thikna hynrei ka thymmei khubor ka ïathuh ba ka jingshah kem jong u Hoque ka dei halor ka jingshah kynnoh leh thok ha ka por ba la pynlong ïa ka eksamin CBSE Class 12 (Physics) ha kawei na ki skul kaba don ha ka jylla Assam ba la pynïaid da ka USTM.
Ka khubor ka iathuh ba ka jingrah tohkit ka long halor ka jingkynnoh ba u Mahbubul u la shim pisa ban ai leh thok ha ka eksamin CBSE Class XII. Shuh shuh ka khubor ka iathuh ba ki don haduh 274 ngut ki khynnah skul ki la thoh ia ka eksammin Physics ha Kendriya Vidyalaya kaba don ha Sribhumi district, Assam kynthup ia ki 45 ngut kiba dei na kane hi ka skul katba 214 ngut ki dei na ka kynhun ERD.
La kynnoh ba ka la don ka jingiapynbeit ban siew pisa ban iarap ia ki khynnah jong ka kynhun ERD ha kane ka eksamin. Hynrei, namarba ka jingkhmihlynti na ka jingkular kam shym la urlong satia kumta ka eksamin ka la poi pynban sha ka huri hura.
Ka skulbah USTM ka dei kawei na ki skulbah shimet kaba la paw ha ka jylla Meghalaya bad ka thaiñ Shatei Lam Mihngi bad ka dei ruh kaba ju shah kynthoh bad shah kynthah na ka por sha ka por ha u Myntri Rangbah ka jylla Assam u Himanta Biswa Sharma naduh ka jingshlei um ha Assam ha kaba la kynnoh ba ka dei na ka daw jong ka jingtih khyndew ha ka skulbah, la byrngem ruh ba ki samla kiba la pas na ka USTM kim lah ban thep kam Sorkar ha ka jylla Assam, ka jingkynnoh ba ka USTM ka la shna ïa ka khyrdop kum ka Mecca kaba dei ka jaka ba khuid katkum ka jingngeit Islam, khamtam ka jingai ïa ki syrnot thok sha ki samla pule wat kiba pyndep ïa ki kyrdan PHD bad shibun kiwei kiwei ki jingkynthoh.
