Shillong, Rymphang, 23: Hynriew ngut ki mynder Bangladeshi ba kynthup ïa ki arngut ki shynrang, arngut ki kynthei bad ar ngut ki heprit ki la shah kem ha ki shipai BSF katba ki dang jam beaiñ sha u pud u sam jong ka ri India lyngba ka khappud jong ka West Jaiñtia Hills District.
Ki shipai BSF kiba la ïoh jingtip na ki tnat syntiat ki la pynlong ka jingap ktem ban ïohbat ïa kine ki hynriew ngut ha khappud.
Ha kawei pat ka jingpynap shrip, ki shipai BSF Meghalaya ki la ïoh bat sa arngut ki mynder Bangladeshi hajan ka khappud ha South Garo Hills.
Ha kine ki jingpynap shrip, ki shipai BSF jong ka 4th bad ka 1st Battalion ki la ïoh ban bat ïa kitei ki mynder Bangladeshi bad la aiti noh ïa kine ki mynder sha ki Pulit ban leh ïa kaba donkam katkum ka aiñ.
Ha ka jingtohkit, kine ki mynder ki la phah ba ki trei kum ki nongbylla sngi ha Basantpur, Mumbai, katba kawei ka kynthei Bangladeshi ka la leit sha Mumbai ban ïalam ïa u kurim ban leit shah sumar. Ki mynder Bangladeshi kiba la shah bat ha South Garo Hills ki la phla ba ki shu kum rung bakla sha u pud u sam jong ka ri India.
