Shillong, Rymphang 23: U Chief Judicial Magistrate (CJM) jong ka Sribhumi District u la kyntait ban ai jamin ïa u Chancellor jong ka skulbah University of Science and Technology Meghalaya (USTM) u Mahbubul Hoque bad aibor ia ki Pulit ban set 14 sngi ha Judicial Custody khnang ba kin ioh pynlong pynlong ia ka jingtohkit.
Kum ban shu kdew hangne, ïa u Hoque la kem da ki Pulit Assam ha ka shiteng miet jong ka sngi Saitjaiñ, halor ka jingkynnoh ba u la pynsuk ïa ki kam thok ha ka por ba pynlong ïa ka eksamin CBSE Class 12 Physics ha Central Public-School ha Sribhumi.
Ïa u Hoque la kem hapoh ka Patharkandi PS Case No. 54/2025 bad Case No. 55/2025, ryngkat san ngut kiwei pat ki nonghikai halor ki jingkynnoh kiba ïadei bad ki rukom pynïaid ïaka eksamin bym hok ryngkat ki jingkular ban ai marks kaba heh sha ki samla kiba ïakhun ïa katei ka eksam.
Ka jingshah kem jong u Mahbubul Hoque ka jia ruh hadien ba la mih ki jingshah kynthah na u Myntri Rangbah ka jylla Assam u Himanta Biswa Sarma na ka por sha ka por bad halor ka jingkynnoh leh thok ïa ka eksamin CBSE, ha Central Public-School ha Sribhumi na ka liang u Myntri Rangbah ka jylla Assam u la pynpaw pyrthei ruh ha ka rynsan X ïa ki kyrteng jong ki khynnah pule kiba la ioh ka jingkular ban ioh ïa ka marks baheh ha ka eksamin CBSE na u Mahbubul Hoque.
