Shillong, Lber, 09: Uwei u runar uba la lait phet na thanat halor ka jingkynnoh ba u donkti ha ki kam tuh ba la ujor pyrshah ïa u ha Khanapara Police station katkum ka Case No. 52(11)2020 hapoh ka section 381 Indian Penal Code (IPC) u la shah kem biang ha ki Pulit jong ka Ribhoi District hadien saw snem da ka jingïarap jong ki Pulit ka jylla Kerela.
U Superintendent of Police ka Ribhoi District VS Rathore u la iathuh ba u Ranjan Borgohain uba sah ha Duliajan, Dibrugarh, Assam u la shah kem ha ki Pulit ka Ribhoi ha ka 20 tarik, Naiwieng, 2020 bad ha kane kajuh ka sngi u la lait phet na along bad ha ka jingthwet kaba jur la iohkem biang ia u hadien saw snem,
U Rathore u la pyntip ruh ba ïa une u runar la lap ba u la riehtngen ha ka jylla Kerela ha kine ki taiew ba ladep bad u la trei ruh kum u nongtrei bylla ha kawei ka Karkhana ha ka thaiñ Perumbavoor ha ka jylla Kerela.
Shuh shuh u Rathore u la ïathuh lyngba ka jingïarap ki Pulit ka Kerela la ïoh kem ïa u bad la ïalam sha Ernakulum District, Kerela.
Da ka jingïarap jong ki Pulit ka Ernakulam la ïoh ban kem ïa une u runar ha ka 7 tarik, Lber 2025 bad la pan bor ruh na ka Kashari ban wanrah noh sha Ri Bhoi na ka bynta ban pynlong ïa ka jingtohkit.
Ki Pulit ki la tian bishar ia u Borgohain hakhmat ka Chief Judicial Magistrate ha Nongpoh.
Ki Pulit ka Ri Bhoi ki la ai khublei ruh ïa ki Pulit ka jylla Kerela kiba la ïarap ha kane ka kam.
